Awe mainta a duna un presentacion cortico riba e ultimo desaroyonan pa loke ta trata e
resultadonan di eleccion y formacion di Gobierno. Ta haya esaki importante como kiera cu tin
basta dia tin diferente speculacion andando y tin diferente punto cu a bin padilanti cu a kere
di parti di partido AVP, mester trece padilanti y tin algun punto tambe, cu como gobierno
mester trece padilanto.

Segun minister Arthur Dowers, e resultado di eleccion a buta cu partido AVP a sali e partido
mas grandi despues di eleccion y e siman aki a haya un invitacion pa papia cu informador, na
momento cu e ta bay haci e pasonan pa forma un Gobierno. Di biaha, despues di eleccion a
mira cu sra. Evelyn Wever-Croes a bisa cu e kier drenta Gobierno mas lihe posibel. E kier
drenta hasta prome cu e termino cu ley ta stipula y a bisa cu e gobierno aki tin cu bay mas
lihe posibel. Pesey el a brasa Otmar Oduber pa forma un Gobierno. Despues a cuminsa mira
cu nan ta backpadel y cu nan no tin pura, pa studia cierto cosnan. Awo tin di compronde cu
nan tin pura y kier forma e Gobierno mas lihe cu ta posibel. Por a nota cu sra. Wever-Croes
ta bisa cu cierto carteranan ta keda pe y despues ta mira algun dia despues e carteranan ey,
e ta dispuesto pa entrega nan na otro partido tambe. Ta un sistema di flip flop ta mirando pa
loke ta trata e formacion di e Gobierno aki.
En todo caso, como e partido di mas grandi di e eleccion aki y e partido cu pueblo a duna
mas confiansa, ta sinti cu ta nan responsabilidad pa papia cu informador pa duna nan punto
di bista con ta mira e proceso aki. Loke a bisa formador ta, como partido AVP cu e partido cu
pueblo a demostra mas confiansa den dje, ta dispuesto pa combersa cu e partido mas grandi
di oposicion awor aki, pa mira si ta posibel cu nan por bin cu nan programa cu AVP ta kere ta
aceptabel, pa por coopera na dje pa garantisa pueblo un Gobierno stabil y mas cu tur cos, un
Gobierno cu ta confiabel. A bisa tambe hopi cla, cu na no ta dispuesto pa traha cu un partido
chikito cu tur sa su historia con el a lanta.
A tende algun dia pasa un persona hopi yega na partido MEP, den e caso aki, sr. de Ruijter, a
splica hopi explicito e partido a wordo lanta y cu ki interes el a wordo lanta. E partido aki ta
carece di integridad di tal forma cu bao di ningun condicion lo kier forma parti cu un partido
chikito asina aki.
Ta hopi importante pa mustra riba algun punto cu den e dianan aki a bin dilanti, na momento
cu e bay bin na informador y gobernador a tuma luga. Ta bon cu den cuadro cu pensamento
di e partido, esaki wordo formula.
Ta bon pa pueblo realisa cu sra. Wever-Croes, den campaña, a hiba uno caminda el a
priminti masha hopi cos na e pueblo aki. El a priminti esakinan, willens en weten, no por yega
otro conclusion, cu e tabata tin tur informacion caba. E tabata tin algun documento brasa den
su man y a bisa cu e no tabata sa e situacion financiero di pais Aruba. Asina a tende
diferente otro cos cu ta pensa, cu sea cu nan no ta papia berdad of sra. Wever-Croes tin hopi
luna, manera cu e ta wordo acusa, cu e no ta haci su trabao. E situacion financiero na Aruba
awe, ta mas cla cu cualkier otro momento den pasado. Na momento cu AVP a bin den
Gobierno 8 aña pasa, a topa cu un situacion berdaderamente caotico. Por corda, un
presupuesto supletorio cu nan a entrega un dia prome cu nan a baha for di Gobierno,
caminda cu tabata tin extra buraco den e presupuesto di e aña cu a pasa di 150 miyon florin.
No ta papiando di e presupuesto di futuro, sino esun cu nan a laga. Ta hopi importante pa
realisa cu na momento cu bay un campaña y den e caso aki tin cu keda corda riba sr. Nel
Oduber. Den e dianan aki Oduber a duna diferente presentacion basta humoristico y caminda
el a papia di un dori cu un scorpion. Awor aki nan tin un dori y tin un scorpion cu dos rabo cu
veneno den dje riba lomba di e dori aki. Ora cu tene cuenta cu e mesun Oduber bisa cu
Gobernacion, el a bisa ta con Gobernacion ta. El a bisa tambe kico ta campaña.

Campaña ta un cos, gobernacion ta otro cos y Wever-Croes ta pone esaki den practica. Kico
e ta bisando ta cu e no tabata sa di e situacion financiero di Aruba, e no tabata sa realidad di
pensioen fonds y awor aki, CFT a pone tur cos hopi cla riba papel. Pero sra. Wever-Croes
tabata tin e informacion aki di antemano. Ora cu el a bay ilustra un di nan, a bay cas di
hende, instrui su hendenan pa bay campaña bisando cu e ta bay baha edad di pensioen. E
tabata hopi bon informa riba e situacion di nos pensioen fonds. E sa tambe, con nan a laga e
pensioen fonds 8 aña pasa y e sa tambe tur esfuerso cu AVP a haci, bao di liderasgo di sr.
Mike Eman e tempo ey, cu a scoge, no di bay den confrontacion cu comunidad, no di bay den
confrontacion cu ningun hende, sino cana un caminda di dialogo pa asina soluciona tur
problema, cu partido MEP a laga. Nan a bay un campaña, engañando pueblo cu ta bay haci
cierto cosnan y awor aki prome cu cos cu ta haci, bay busca un papel pa bin bisa pueblo cu e
no tabata sa cu e situacion financiero ta malo y pesey kier bay tuma medida.
Conoce e MO di partido MEP, pero mas cu tur, di e spindoctor, Otmar Oduber. Otmar Oduber,
tempo cu tabata den Gobierno, ta e mesun MO aki e tabata kier pa implementa e tempo ey. E
tempo ey, Mike Eman a bisa no, no ta cuminsa cu ningun blamegame. Ta bay sali y traha
habri, transparente y inclui e comunidad den e solucion di e problemanan.
Awor aki ta mira cu nan kier bay sconde tras di e asina yama cu tin problema den
presupuesto di otro aña pa prepara e medidanan. A tende tambe cu ta Hulanda nan ta bay
pasobra ta Hulanda ta bay yudanan soluciona e problemanan cu tin. A mira berdad cu tin un
sr. Bosman, cu ta compronde cu ta amigo di Evelyn y enemigo di Otmar, pero nan ta hunto
den un coalicion, cu a yuda nan den campaña y sa su agenda pa pais Aruba. Hustamente
cerca e hendenan aki nan ta bay awor aki, segun nan ta bisa, pa soluciona e problema. Nan
no por cumpli cu ningun promesa cu nan a haci pasobra awor aki, pasobra e buraco ta mas
grandi cu nan ta kere.
A tende tambe cu sr. Oduber ayera, ta trece padilanti cu ta un escandalo, cu AVP tin un
overschrijving di presupuesto di husticia di 12 miyon awor aki. Na e momento aki, segun
Dowers, a laga financien haci calculacion ainda tin 42 miyon disponibel pa Husticia por
percura pa e finansas keda core, esta tur e obligacionnan cu nan tin keda core te cu fin di aña
y tambe ta asina cu tin cierto parti den presupuesto por ehempel e parti di overtime, cu e
hendenan berdaderamente por yega na un overschrijving. Esey ta bin pasobra cu nan ta
iresponsabel y no ta ningun escandalo. Ta un escandalo cu na momento cu nan mes ta
manda hende comete atraco y ta lanta hende contra comunidad, pasobra cu segun nan no tin
siguridad. Na momento cu paga polis pa nan cumpli y mantene e siguridad di nos pais, nan ta
yama un escandalo. Ta spera cu sr. Oduber, e escandalonan cu e ta aden, cu e lo ta para y
tin su contestanan. Ta bisa cu ta bergonsoso cu un politico, cu tabata forma parti di un
Gobernacion pa 7 aña largo. A calcula con e por a sali y a purba cu na momento cu ta sali pa
influencia cierto parlamentarionan di e partido pa baha Gobierno, ta spera cu e dori cu ta bay
Goberna awor aki, sa cu e scorpion aki ta bay ta continuamente bezig, pasobra cu den AVP
mes cu tabata tin 13 asiento, a purba di influencia e parlamentarionan pa baha Gobierno.
Awor aki ta deseanan suerte. Pero un cos si, e trankilidad y stabilidad cu e pais aki a conoce
pa e ultimo 16 aña, no ta bay tin awor aki, pasobra no ta pueblo a gana eleccion e biaha aki.
5 of 6 comerciante a gana e eleccion awor aki. Nan a pone e placa disponibel pa cumpra
cierto hendenan y Dowers ta sigur cu nan lo bay purba di dicta loke ta bay pasa den e pais
aki. Loke nan tin cu tene cuenta cune cu partido AVP ta para hopi vigilante cu nos hendenan
y lo bay tin un bista hopi skerpi riba nan, na momento cu sea bin cobra of momento cu nan
kier bin demanda cosnan contra di nos pueblo, pa nan por tin probecho, cu ta bay ta para
fuerte ta warda nan. AVP ta e partido mas grandi di e pais aki. Un partido solido, un partido
determina pa percura cu cosnan cana manera e tin cu cana den e pais aki.

Comments

comments