AVP: Sin e conseho di CFT di segundo kwartaal no por debati den Parlamento

Fraccion di AVP den Parlamento awe merdia a bandona reunion y na salida lider di fraccion Marlon Sneek a bisa cu e miembronan di coalicion kier haci show al estilo di Radio Rochela.
Nan a pidi documentonan pasobra entre otro tin informacion cu Gobierno ta coriendo atras den entradanan ricibi en comparacion cu aña pasa y pretende cu tur cos ta bon na Aruba. Un di e documentonan ta e kwartaal rapportage cu CFT ta duna riba e cifranan cu Gobierno ta entrega. A pidi pa haya tur documento pasobra nan tin indicacion cu e cifra di entradanan no ta yega na loke a pone.

E presidente di Parlamento a nenga pa pospone e reunion pa busca e documentonan pa cual e fraccion a dicidi cu nan no ta keda paden. Ta bay warda rapport di CFT yega y ta pidi un reunion bek. Despues di pretende di transparente, no tin tur cifra riba mesa. Pues ta gañando pueblo. Hasta hefenan di departamento a wordo yama na Hulanda pa duna cuenta. “Nos no ta participa den e tipo di shownan aki. Ora cu tur documento ta riba mesa, nos ta participa bek.”

Fraccion di AVP ta bandona reunion pa falta di transparencia

Fraccion di AVP ta bandona reunion pa falta di transparencia. Click e link pa mas https://24ora.tv/30sn6nb

Posted by 24ora on Monday, August 19, 2019

CFT, Benny Sevinge a enfatisa, ta esun cu ta duna un bista riba e cifranan di e presupuesto, con e ta canando, y si tur cos ta real. Nan informe ta bisa si cifranan ta cuadra. Tur e ultimo cartanan di CFT ta bisa cu e cifranan no ta cuadra. Nos kier debati riba e cifranan di e di dos kwartaal pa cual mester e evaluacion di e di dos kwartaal, pero Gobierno kier uza esun di prome kwartaal. “Si bo no por mustra mi e cifranan, sosteni door di CFT, nos no por discuti con e pais ta wordo maneha,” Sevinger a bisa. Y a agrega cu e cifranan di Banco Central ta bisa cu e cifranan di Gobierno no ta cuadra. “Ta un debate politico tumando luga eyden pa trata di wanta tur hende hunto. No tin un bon comunicacion entre Gobernantenan y esnan cu ta apoya Gobierno. Un show cu nos no ta parti di dje.”

Ex Minister y actualmente Parlamentario Richard Arends, a bisa cu a bandona e reunion pasobra ta bay scucha loke cu Gobierno kier pinta bunita y cu ta basa riba e prome kwartaal. Ya caba e periodo ey a pasa. Ta imposibel pa hiba un reunion al caso, sin e conseho di CFT pasobra no por controla e di dos mita di aña. No a haya nada ainda di e ley di sugartax, cu ta hinca den e presupuesto. A aumenta grondbelasting pero no sa con e cobransanan ta bayendo. Esaki tur ta mustra cu pa fin di aña ta bay tin un deficit.