AVP riba caya repartiendo caha di sushi pa tene rutanan di Carnaval limpi

Awe mainta na San Nicolas y awe nochi na Playa, miembro y parlamentarionan di partido AVP ta riba caminda pa asina reparti e acostumbrado cahanan di sushi, di e manera aki yuda tene nos rutanan limpi.

Diabierna ultimo na Cas di Partido AVP, miembronan di partido y boluntarionan a bin hunto, pa prepara pa e cahanan di sushi por ponenan canto di caminda, unda e ruta di carnaval ta, pa asina por alivia e sushi cu ta bin riba caya, pa Serlimar tambe, enbes di tin cu bari y busca e boternan, e cupsnan, ta haya nan caba den e cahanan cu partido AVP tur aña ta pone, tanto riba e ruta di San Nicolas, como esun di Playa.

Segun lider di partido y ex prome minister, Mike Eman, e aña aki, ta un poco tristo y dolor, pasobra un personahe no unicamente hopi importante pa e partido, pa pais Aruba, pero cu specificamente cu e accion aki semper tabata e motor pa yuda prepara e cahanan aki, a fayece diahuebs, kende ta Eric Agunbero.

Un persona cu un curason sumamente grandi pa su pueblo di Dakota, pa su partido. Semper a duna su maximo y awe, riba e dia cu ta bay subi aya y haci e trabao cu Eric semper tabata compaña e grupo cun’e, a bay fayece, despues di a sufri hopi durante e ultimo dos añanan, luchando cu un malesa sumamente fastioso.

Manera cu Eric semper ta bisa, “the man who refused to die”, a bringa hopi duro, sinembargo el a fayece.

Palabranan di forsa y condolencia na famianan, personanan cu semper tambe, hunto cu Eric a convivi cu e partido. Pesey ta sumamente den un momento di sentimentonan mixto pasobra na e mesun momento cu ta preparando pa e trabao cu nan ta haciendo cu hopi placer, cu hopi amor pa e pueblo di Aruba, na e mesun momento ta bibando e despedida sumamente penoso di Eric.

Ta pidi comunidad tambe pa tuma su famia den oracion, pasobra semper nan a entrega Eric pa sirbi Aruba, sirbi e pueblo, sirbi e partido y awe e no tey mas.

Den su memoria diasabra ta subi caya toch cu e trabao y e dedicacion cu el a haci semper, como un inspiracion. Pesey e trabaonan a continua tambe den Cas di Partido.

Por mira tur generacion preparando y yudando pa ta riba caya.

Segun e exmandatario, si tuma un averahe di cuanto bleki, botter por bay den un caha asina, ta papia hopi lihe di 60 pa 70 bleki of botter, y di e boternan di 2 liter, un 40 ney. Ta papiando di 1100 caha. E ora ta papiando di casi 60 mil boter of cups, cu lo tabata tur caminda riba caya, hopi biaha pa falta di suficiente caminda pa pone tipo di desperdicionan aki, door cu tin na cada cuater kavel, tin un caha.

Ta percura pa e yuda ora cu Serlimar ta haci limpi anochi. Hopi biaha nan no mester busca mes hopi, si 50 of 60 mil boter of cups lo tabata riba caya, pa por a percura pa por alivia nan cu e trabao cu nan ta haciendo.

Ta pa e motibo aki mes tin cu coopera cu partido tambe. Diasabra mainta nan tabata na San Nicolas, diasabra anochi na Playa, pa hunto haci e trabao pa tene Aruba limpi y percura pa Carnaval ta uno sigur y cu por ta hopi orguyoso di dje.

Miembronan di partido y fraccion di partido, tur lo ta riba pia diasabra, sea na San Nicolas of na Playa of na tur dos, pa percura pa e trabao aki por cana y na e mesun momento duna asina un ehempel tambe importante cu medio ambiente, cu proteccion y cuido di nos isla, ta responsabilidad di nos tur.

E trabao aki ta wordo haci den feliz memoria di Eric cu no tey mas, kende semper tabata un figura clave den e accion aki, mescos cu tur otro accion. Awe nan tey pa sigui cu e trabao cu el a haci semper cu hopi dedicacion.