AVP: Pueblo ta sufri mientras minister ta gosa

Lider di Partido di Pueblo Arubano (AVP) a duna un declaracion diamars mainta pafo di Parlamento pa motibo cu e ta sinti cu e mester expresa, den nomber di pueblo, e disgusto cu ta sinti pa cu e actitud di mandatarionan. Eman a cuminsa na splica con e ciudadadano ta sin perspectiva of buscando pa bandona Aruba y djey ta ilustra con ministra ta demostra di ta biba dushi riba custia di pueblo.

Eman a bisa: “Tin cu ta dicidi cu simplemente no tin perspectiva mas y te hasta ta contempla cosnan cu nos no kier ni yega na pensa na dje y tin di nan ta yega na otro extremo di dicidi pa bandona e suelo di nan pais.”

E lider di oposicion a mustra cifra actual di Oficina Central di Estadistica cu ta bisa cu nos comunidad ta mirando un tendencia cu a mira unicamente hopi aña pasa tempo cu Lago a cera na Aruba. “Un tendencia caminda ciudadano ta lanta mainta y ta bisa: mi no ta kere mas den Aruba. Mi no ta kere mas cu mañan e futuro di mi yiu ta wordo sirbi na Aruba y e futuro di mi mes ta wordo sirbi na Aruba,” Eman a relata.

E lider politico ta wak cu awe e noticia ta negativo y den e negativo aki e uniconan cu ta na Aruba ta lider di oposicion, lider sindical y lider comercial; cada un preocupa cu e destino di e pais, trahando aki na Aruba na juli y augustus pasobra nos sa cu ta aki riba suelo bo ta scucha e dolor di e hendenan. Aki ta unda bo tin cu sirbi e pueblo. Mientrastanto ta haya potret di mandatario manda pa medionan di comunicacion cu nan ta cu vakantie, ta disfrutando vakantie; otro ta den pool. 

Pa e relato completo, lesa TREMPAN