Algun luna atras tanto Conseho di Minister di Reino como CAFT a aproba presupuesto 2018 di pais Aruba, bou condicion cu lo mester corta un suma cuantioso e aña aki ainda den gasto di personal.
Ademas lo mester a bin un cuadro financiero nobo y yega na palabracionnan nobo cu Hulanda pa loke ta trata e normanan. E conseho di CAFT riba presupuesto supletorio 2018 ta bisa enfaticamente cu Gobierno no a cumpli cu e palabraciona nan haci. “Gastonan di personal a sigui subi enbes di baha manera cu a wordo palabra cu Hulanda y entradanan incidental ta wordo uza pa financia mas gasto,” Parlamentario Richard Arends, miembro di fraccion di AVP a declara.
“Nos a bin ta alerta e desaroyo aki durante e ultimo lunanan y fraccion di AVP di manera constructivo a presenta un nota unda ta indica e aumentonan di gasto na aña 2018 compara cu realisacion di 2017,” Richard Arends a declara. “Den su conseho CAFT ta confirma cu Gobierno a gasta casi 100 miyon mas cu aña 2017.”
Gobierno a presenta 7 punto cu lo a conduci na reduccion di gastonan di personal pa aña 2018. E plan aki a consistidi e.o. mantene un vacature stop; lo no renoba contractnan cu ta finalisa; lo elimina aumento automatico di periodiek; lo reduci overtime; lo stimula VUT; lo elimina overtolligheidspoel. “Nos a remarca e tempo ey cu e 7 puntonan aki no ta suficiente pa logra reduci e gasto di personal desea”, Arends a splica a base di su experiencia. “Awor nos ta wak cu e gastonan di personal a subi enbes di baha.”
E parlamentario semper tabata hopi critico riba e cuadro financiero presenta door di Gobierno. “Te dia di awe no tin un acuerdo riba e normanan nobo,” e la bisa y a indica cu e ‘crisisheffing’ nunca tabata destina pa reduccion di deficit ni di debe, sino pa financia maneho nobo riba lomba di ciudadanonan y empresanan. “Awor despues cu a presenta e FEM, Gobierno kier oportunidad pa corigi erornan cu nan a wordo alerta riba dje, e.o. cu entradanan adicional mester bay completo pa reduci deficit y debe, ” segun Parlamentario Arends.
Despues di no a determina e saldo pa aña 2016 y consecuentemente esun di 2017 y añanan siguiente, como tambe keda sin cumpli cu palabracionnan haci Gobierno deliberadamente ta strobando e proceso di supervision financiero. Den menos di un luna Gobierno mester corta 26 miyon di presupuesto 2018. “CAFT no ta impone nada riba Gobierno, nan ta djies urgi Gobierno pa respeta e palabracionan pa por sigui cu e proceso di stabilisacion di finanzas publico cu ta andando di 2014,” segun Parlamentario Arends. “E contenido di e conseho ta confirma un biaha mas e falta di confiansa den e maneho financiero-economico cu ta wordo hiba.”
