Fraccion di AVP a yega Parlamento y a entrega dos carta, un ta e rappel y e otro ta pa minister contesta kico tabata e contraoferta manda pa Hulanda. Esaki relaciona cu e condicionnan stipula pa Aruba haya e fiansa di 204 miyon florin for di Hulanda.
Lider di Fraccion di AVP, Marlon Sneek, ta corda bon cla cu Minister Presidente y Minister di Finansa a bay Parlamento pa splica e condicionnan di Hulanda. A keda di manda un contraproposicion pero nunca mas a mand’e pa Parlamento.
Awor e fraccion di AVP ta pidi Prome Minister pa presenta de Parlamento y bisa kico tin riba mesa. Dia 14 di augustus lo tin un reunion den Rijksministerraad y eynan decision lo cay. Fraccion di AVP kier sa kico ta e decisionnan cu Gobierno di Aruba a tuma. Gobierno di Corsou lo ta na television y lo duna un splicacion di kico nan oferta cu nan lo manda como contraproposicion na Gobierno di Reino.
Prome Minister di Aruba no tabata sincero cu Parlamento y awo a core hinca su mes den cuarentena p’asina no bin dilanti y bisa pueblo kico tin. Segun Sneek, si Minister ta kere den cuarentena e ta keda, e ora p’e manda e informacion digital pa pueblo y pa fraccion di oposicion, esta AVP, pa conoce kico ta e oferta manda pa Hulanda. Y asina Parlamento lo por sa kico ta spera nos pais na medidanan den e lunanan nos dilanti.
