AVB y Lotto a firma MoU pa traspaso di Compleho Deportivo Jose F. “Buchi Panama” Wever

382

Tabata un momento historico y importante pa Arubaanse Voetbal Bond, esta e firmamento di Memorandum of Understanding (MoU) cu Stichting Fundacion Lotto pa Deporte. Despues di negociacion, awo a yega na firma un MoU. Den e MoU aki ambos partido ta bay di acuerdo p’e uzo y maneho di Compleho Deportivo Jose F. “Buchi Panama” Wever pa un periodo defini. 

E MoU ta un intencion entre dos partido, den caso aki FLPD y AVB, pa yega na un acuerdo di uzo y maneho di e facilidad di Compleho Deportivo Jose F. “Buchi Panama” Wever , esta Yara Complex. Den e traspaso aki e federacion lo ta responsabel pa maneha e facilidad di Yara, cu ta beneficioso p’e federacion. Lo organisa cantidad di actividad eynan, por hempel e academia cu a cuminsa e aña aki di U-13, U-15, U-17 y U-20. Tambe tin cu prepara seleccionnan, cu awor lo ta mas facil cu e facilidad aki.

AVB y Lotto a firma MoU pa traspaso di Compleho Deportivo Jose F. "Buchi Panama" Wever

AVB y Lotto a firma MoU pa traspaso di Compleho Deportivo Jose F. "Buchi Panama" Wever

Posted by 24ora on Wednesday, November 18, 2020

“Nos mes por organisa actividadnan sin tin di depende riba otro”, Ing. Richard Dijkhoff, presidente di AVB, a bisa. Na e facilidad aki AVB lo haci tur cambio necesario por ehempel cambia e yerbe artificial, cambia luz, lo reconstrui e tribuna di tal forma cu por acapara e publico. Ta bay haci e adaptacionnan necesario na e facilidad aki y hacie bira uno cu ta cumpli cu exigencianan pa por tin actividad di futbol.

Directiva di Arubaanse Voetbal Bond (AVB) hunto cu Fundacion Lotto pa Deporte (FLpD) durante e ceremonia. D.r.p.d. Elias Kock di FLpD, Silvio Janga, presidente di FLpD, ing. Richard Dijkhoff, presidente di AVB y Roland Tuitt, director di FLpD.

Locual a sosode awor ta mas bien un culminacion di un proceso cu a inicia for di aña 2008, ora cu AVB a dicidi pa construi un facilidad hunto cu Fundacion Lotto pa Deporte (FLPD). E intencion tabata pa traspasa manejo pa AVB asina cu caba cu construccion. Esey nunca a sosode pasobra a trah’e malo, cu un “dode hoek” den tribuna. Te dia di awe, nunca mas a soluciona e problema ey, cu consecuencia cu no a uza e compleho aki tampoco.

Den un otro intento di AVB pa yega na un entendimiento cu FLpD pa un posibel traspaso di maneho di e compleho, cu AVB a propone FLpD cu nan ta dispuesto pa inverti den e facilidad pa por uz’e. No ta un secreto cu pa motibo cu no a mantene e facilidad, cu el a bay hopi atras y mester di un inversion grandi pa por uz’e debidamente atrobe. 

Aki ta caminda cu FLpD a dicidi cu nan ta dispuesto pa pasa e maneho over pa AVB pa 20 aña, contal cu AVB haci e inversionnan necesario. Banda di e inversionnan menciona, AVB a ofrece FLpD cu lo para garantia pa e mantencionnan tuma luga, AVB lo cubri e gastonan di seguro, e gastonan di utilidad, gastonan di erfpacht, etc., tanten cu e maneho ta den nan man.  

Ta basa ariba e intencion aki AVB y FLpD a yega na e palabrashon cu lo traha primeramente riba un MoU y cu dentro di un luna lo firma un acuerdo pa FLpD traspasa e maneho manera palabra.  

Roland Tuitt MBA, director di Fundacion Lotto pa Deporte a bisa durante firmamento di e Memorandum of Understanding cu e ta masha orguyoso di por logra esaki pa e pueblo di Savaneta. El a bisa di a nace na Savaneta y lanta den e bario ey. Ing. Richard Dijkhoff di Arubaanse Voetbal Bond ta orguyoso di mira culminacion na un proceso largo di negociacion pa por a alcansa e momento aki den historia di futbol na Aruba.

E paso aki ta mustra direccion cu e federacion a tuma prome. Tambe ta den negociacion avansa pa un otro facilidad. Loke falta ta pa tuma un decision, pasobra otro aña na maart tin un wega contra Canada. Si no tin un facilidad cu ta cumpli cu e exigencianan di FIFA, lamentablemente esey no ta posibel. Esey ta pone cu mester bolbe bay hunga na Corsou y ta involucra gastonan extra den un actividad asina. 

Ta leu cu e negociacionnan, FIFA ta dispuesto pa inverti y AVB tambe. Tempo ta hunga un rol importane, pasobra no tin mucho tempo ya cu na maart tin weganan internacional. Pronto un decision mester cay si ta of no ta acepta e proposicion riba mesa. 

Presidente di Arubaanse Voetbal Bond, Ing. Richard Dijkhoff, ta skirbi un otro logro importante riba su nomber, cu acuerdo preliminar pa maneha e veld di Yara. Cu esaki futbol local ta haya un localidad adicional pa por tin mas acceso na wega di bala.

Pa AVB esaki ta un momento historico y importante pasobra pocopoco e federacion ta haya reconocemento pa su trabou. Por ta ainda hopi hende no ta mira unda e federacion ta hiba futbol di Aruba, pero den e lunanan dilanti esaki ta bay bira mas bisto ora reactiva su actividadnan.