Pa evita escalacion: No ta cera ilegalnan mas na Sabana Berde

E accion di e indocumentadonan a bin ta aumentando y mirando cu nan por intensifica, a dicidi di tuma paso drastico. Gobierno a opta pa no core ningun risico mas, dor di tin ilegalnan riba dak protestando den un area di siguridad, unda avion ta subi y baha!

Dialuna e grupo a bay den accion, pasobra nan ta haya nan encarcelamento inhusto. Nan ta prefera pa manda nan pais, mirando cu nan tin varios luna cera simplemente pa viola ley di admision y expulsion. Y si no por deporta nan, laga nan busca un persona cu ta para garante pa nan cu e condicion cu nan mester presenta tur dia pa firma.

Dialuna Minister di Husticia Andin Bikker tabata henter atardi den reunion cu hefenan di departamento y conseheronan y awo ta parce cu a yega na un solucion temporal. Mayoria di esnan na FOL na aeropuerto ta Venezolano, pa kendenan no tin un solucion rapido pa loke ta nan deportacion. Mirando e aspecto di siguridad y evita cu nan ta subi pista di airport como parti di nan accionnan a dicidi, di cera e centro di detencion na FOL (aeropuerto).

Ta traspasa ilegalnan cera na GNC di Sabana Berde pa Dakota. Click pa mas informacion: https://24ora.news/30OmFG0

Posted by 24ora on Tuesday, August 11, 2020

Entre esnan deteni tabatin seis (6) Dominicano cu a logra deportanan awe pa Republica Dominicana. Tabatin 16 ex preso (mayoria Venezolano), kendenan a caba di sinta nan castigo. No por laga nan liber ni cu garante mirando e delito cu nan a comete, pa cual a dicidi di manda nan bek pa KIA, unda tin mas siguridad y evita cu nan por huy. E a transporta e resto di indocumentadonan pa e Centro di Detencion na Dakota.

E detencion di nan Dakota lo ta algo temporal, mientras cu ta yega na e formula pa laga nan liber temporal, cu e condicion cu nan mester bin firma tur dia. Esaki sperando cu via di Hulanda por yega na un palabracion pa transporta e personanan aki pa Venezuela.

Pa algun luna caba e ilegalnan a bin ta organisando diferente accion di protesta, subiendo dak di e instalacion pa mustra nan malcontento. Hasta un biaha a subi pista di aeropuerto riba un diasabra anochi. Despues di esey a trata di yega na un solucion via di e consehero di Minister Bikker, esta Milco Baiz, pero esaki no a logra.