Autoridadnan a descubri cartel di droga, arma y placa

31915

Awe marduga autoridadnan a yega na un cas den Caya Frere Johannes # 22 na Paradijswijk, cu un ordo di Hues pa por drenta paden y busca den e cas. E ordo no a bay perdi, pasobra na final a detene tres sospechoso, a tuma autonan den beslag, droga, placa y arma cu nan a haya den e cas.

Polis a detene tres sospechoso na e cas. Ta trata aki di e conoci di Polis caba, Richard Rasmijn, su sobrino Cesmar Rasmijn hunto cu su pareha Niurka Ramirez. Nan lo mester bay responde awo pa e placa efectivo, e droga y e arma di candela cu a haya den nan cas.

Riba e combinacion di foto por mira di robes pa drechi: Richard Rasmijn, Cesmar Rasmijn y Niurka Ramirez. A presenta nan tur tres dilanti un Fiscal Auxiliar cu a ordena nan encarcelacion pa e prome dos dianan pa interogacion y investigacion. Pa diabierna awo nan lo mester topa un Hues Comisario pa dicidi riba posibel prolongacion di nan detencion.

Ministerio Publico a confirma awe cu e accion ta di Afpakteam, cu ta representa un cooperacion entre varios departamento hudicial, manera ta Ministerio Publico, Cuerpo Policial Aruba, FIOt di DIMP, Koninklijke Marrechaussee y Warda Costa di Caribe Hulandes. Ta sospecha cu e grupo aki ta envolvi den labamento di placa. E investigacion ta tumando luga pa bastante tempo caba, den cual a acumula suficiente prueba pa awor detene e sospechosonan y prepara pa presenta nan dilanti Hues.