Durante juni y juli di e aña aki a tuma luga na Medellin, Colombia, e di 29 Festival Internacional de Poesia de Medellin. E autor/poeta Arubiano, Quito Nicolaas, a participa na e festival prestigioso aki.
A base di cierto criterianan un comite ta selecta e invitadonan pa e festival. E invitado mester entrega un poesia na Spaño, un poesia na Ingles y un ensayo tocante un di e temanan di e festival. E ensayo di Sr. Nicolaas tin como titulo “The Decadence of Human Rights Standards”. El a entrega tambe poesianan na Spaño, di cual un di nan ta traduci na Ingles.
Na Medellin Quito Nicolaas tabatin diferente presentacion na bibliotecanan, Universidad, centro cultural di Andes y den un parke na aire liber. Su audiencia tabata bira hopi entusiasma ora e conta di nos idioma Papiamento. Tabatin oportunidad tambe pa sinta na mesa y combersa cu otra poetanan invita tocante literatura, cultura di lesamento y con pa stimula e lesamento di literatura. Algo cu el a vocifera fuertemente y su coleganan poeta/escritor ta di acuerdo cu ne ta cu lesamento y literatura ta traha na civilisacion di un pais y su pueblo.
E Revista Prometeo a publica Memorias del 29o Festival Internacional de Poesia de Medellin, un tomo cu poesianan di e poetanan invita di Africa, America, Asia y Europa. Quito Nicolaas ta aparece den e tomo cu 3 poesia na Spaño y un na Ingles. Biblioteca Nacional Aruba ta gradici sr. Quito Nicolaas pa percura pa duna Ramon Todd Dandare un ehemplar pa entrega na departamento Arubiana-Caribiana. Un gesto hopi aprecia. E buki ta den coleccion nacional na Arubiana-Caribiana den Bachstraat.
