Di 29 juni pa 6 di juli proximo lo tuma lugar e Festival Internacional di Poesia na Colombia, unda e aña aki poetanan di mas cu 80 pais lo ta participando.

Durante e festival aki e poeta, escritor, essayista Arubiano Quito Nicolaas lo duna un charla cu e tema ‘The Decadence of Human Rights Standards’ E aña aki e poeta multifacetico a ser invita pa participa na e prestigioso festival aki.

Despues di un proceso di seleccion pisa, unda e autor mester a entrega un lista di tur su publicacionnan, ademas dies poesia na Spaño y dies poesia na Ingles y su texto di un charla, finalmente el a keda selecta pa participa entre tur e paisnan grandi. E echo aki cu el a keda selecta, e autor a considera como un coronacion di su obranan literario.

Como poeta e lo ta bay ta declamando na cinco diferente localidad y cada biaha pa un publico grandi. Pa cada un di su presentacion lo tin mey ora reserva, unda el lo declama e poesianan na Papiamento y un otro poeta lo lesa e traduccion sea na Spaño of Ingles. E poesianan na Spaño a ser traduci pa e linguista Ramon Todd Dandaré y esnan na Ingles a keda traduci pa Mildred Antonius.

Durante e festival y riba un plataforma internacional lo tin lansamento di su ultimo tomo di poesia ‘Argus’, cu un seleccion di poesianan na Hulandes y Ingles. E obra aki ta ser publica pa e Cas Editorial ‘In de Knipscheer’ na Hulanda. E poesianan cu sr. Nicolaas lo declama tin di haber cu temanan contemporaneo, manera e.o.: biba entre dos cultura (Caribense-Europeo), e individuo y su naturalesa, victimanan di guera, e generacion XYZ y e bida cotidiano.

Su textonan tin elementonan cu ta relaciona cu su isla natal Aruba, di cual e ta conecta cu e mundo mas grandi. Na ciere di e festival e tin e privilegio di ta un di esnan elegi pa un biaha mas deleita e multitud grandi cu su lyrica social. Cu su presentacion na Medellin, e autor ta duna reconocimento na su idioma Papiamento y exporta nos cultura pa otro paisnan.

Comments

comments