Dialuna merdia, na momento cu e conocido “Ski” a fayece na unda e ta frecuenta pa añanan largo, pues tras di e kiosconan na “waf chikito”, Fiscal di Ministerio Publico a duna ordo pa tuma su curpa den beslag. Husticia kier ta sigur di e motibo di su fayecimento, specialmente despues cu a tir’e den fin di siman. Mester ta sigur si esey ta e causa di morto, of e enfermedad cu e ta sufri di dje pa algun tempo caba. Ayera nochi e autopsia a keda cla y a entrega e curpa na famia, cu por sigui numa cu entiero.
E echonan:
Diabierna manece diasabra pa mas o menos 4:00am a drenta yamada na Polis cu a scucha tiro den Rancho. Na yegada di Polis a topa cu algún hende riba caya cu a indica cu un auto a pasa tira riba Ski y move. Algun minuut despues a drenta yamada cu Ski tabata na e truck di cuminda “Candela” dilanti Royal Plaza Mall pidiendo ayudo. Ambulance e busk’e, trat’e eybou y hib’e Hospital pa tratamento medico. El a haya bala den pia y den su las. Diadomingo el a Sali di Hospital y dialuna merdia e tabata benta patras di e kiosconan na Waf Chikito sclamando di dolor. Pa 11:30am a manda patruya di Polis na e sitio, pero ora a yega a constata cu e no tabata duna señal di bida. Pa 1:20pm Dr. Texiere a constata morto Hugo “Ski” Kock naci dia 6 di mei 1968.
Investigacion:
For di momento di e tiramento, Ministerio Publico ta dirigi un ekipo di Recherchenan di Oranjestad cu ta investigando e acto criminal aki. Ta aprecia tur tip cu por drenta for di comunidad, di hendenan cu por a mira algo diasabra marduga den Rancho of por a tende algo despues di kende(nan) ta envolvi den e acto criminal aki. Tur informacion, pa hopi of poco cu e ta, por yuda na gara e sospechoso(nan) envolvi den e caso aki.
Ayudo pa entiero:
Relaciona cu gastonan di entiero, famia di Ski a acerca Fundacion #Hand4Addicts pa ayudo. Nan lo tin un evento pa recauda fondo diadomingo awor dia 26 di augustus for di 12:00pm pa 4:00pm riba parkeerplaats di Banco di Caribe den Wilhelminastraat. Ey a organisa un BBQ, pero tin un box disponibel pa acepta donacion pa entiero, for di 1 florin te cu 100 florin mes. Tur ayudo lo ta di gran ayudo y sosten na famia cu tin cu carga cu gastonan di entiero awor.
