Autopsia: Ex Taxista a hinca su yiu mata cu “Steak knife”

E homber Frederick “Rudy” Franken di 61 aña di edad ta interna den hospital na Okaloosa County na Merca den condicion stabiel. E ta e sospechoso principal di a hinca su mesun yiu homber, RJ Franken, di apenas 3 aña di edad, diabierna ultimo na nan cas na Merca. Di acuerdo cu Prensa Mericano, autoridad a laga haci un autopsia, cu entretanto a keda cla y a conclui cu e sospechoso a propina e criatura cu varios hinca na su curpa. Recherchenan a haya un “steak knife” den cercania cu awor ta wordo investiga como e posibel arma mortal.

Mester menciona cu despues di a asesina su mesun yiu, e tata Rudy Franken, cu te cu algun tempo atras tabata core Taxi 161 na Aruba, a opta pa purba comete suicidio, dor di hinca su mes cu cuchiu. Sinembargo, e hinca nan cu el a hinca su mes no a logra su meta, esta pa pone un fin na su bida.

E mama di e criatura, esta Darrelly van Dieren, un militar na Merca, a bisa recherchenan na Merca cu e y su pareha ta pasando den problemanan matrimonial serio y cu recientemente el a pidi Rudy Franken su divorcio. E pareha tin un diferencia grandi di edad. No ta conoci si esey tabata motibo cu el a opta e ora pa mata su yiu y purba mata su mes tambe.

E noticia tristo aki a conmove hopi hende na Aruba, specialmente pa e forma con un tata, conoci pa un homber masha trankil, por a yega na un nivel di desesperacion asina avansa pa comete un acto horendo asina. Forsa na famia y conocinan den e momentonan dificil aki.

Comments

comments