Automobolista a para homber cu tabata maltrata pareha

2944

Diasabra mainta, banda di 11’or y mey, Central di Polis a manda un patruya pa Rooi Frances, unda un of mas persona a wak con un homber tabata bati su pareha den auto den presencia di un mucha chikito. Ora Polis a yega, e abusador ya a bandona e sitio caba.

A base di e descripcion di e auto, polis a logra para un auto riba caminda di Santa Cruz cu tabata bay direccion noord. No ta conoci pa nos si enberdad esey tabata e auto cu nan tabata busca, pero nan a tuma dato y e patruya a regresa Rooi Frances, unda e homber a laga su pareha y yiu den tur e solo cayente ey.

Na sitio por a comprende cu e homber na dado momento tabata choca su pareha, mientras e yiu chikito tabata purba di wanta e tata y stop’ di maltrata su mama. Un cabayero cu tabata pasando, a wak e abuso aki pasa y a dicidi di para su auto pa wak con e por yuda. E homber cu a ripara cu tin hende a nota su abuso, a dicidi di subi su auto y bandona e sitio direccion Santa Cruz. Segun informe inoficial cu esaki no ta promer biaha cu e homber ta maltrata su pareha. Pero parce cu den e casonan anterior, e victima no tabata desea di entreha keho contra su pareha, locual ta haci dificil pa polis actua den casonan asina. Despues cu polis a papia cu e dama y a gradici e cabayero, cu a stop su auto pa brinda ayudo, a laga e mama cu su yiu subi den patruya y a bandona e sitio. No ta conoci pa nos, si e biaha aki e dama si lo bay haci un denuncia contra su pareha abusador.