“E ta un proceso normal. Lo dura algun dia ainda prome cu automobilistanan por custuma cu e caminda nobo, cu e rotondenan nobo y haya mas confiansa pa yega subi e rotonde, enbes di para completamente prome cu subi e rotondenan”, asina Ricardo Muller a bisa awe mainta. E ta ex Hefe di Departamento di Trafico di Polis. E ta cu pensioen awendia, despues di a sirbi Cuerpo Policial Aruba durante 40 aña largo, di cual 37 aña el a traha den departamento di trafico.
Nos a acerca e experto den trafico pa yega na un contesta, dicon awor cu Watty Vos Boulevard a habri, 25 kilometer di caminda nobo, 13 rotonde y cu un gasto di 200 miyon florin, cu diripiente e camindanan bieu cu ta conduci na e boulevard nobo, cu tur caminda tin fila. El a splica cu den algun dia mas e chauffeurnan ta custuma y lo normalisa. Aunke el a subraya si, cu durante “peak hours” e rotondenan lo sigui ocupa, mescos cu ta sosode na Amsterdam, Miami, Bogota y na tur otro ciudad grandi. E ta conseha chauffeurnan cu awor cu tin mas opcion, pa scoge rutanan alternativa ora stuur pa hiba muchanan scol, bay trabao of ora regresa cas atardi.
