Auto a subi caminda diripiente den reverse

Pa mas o menos 3:40pm a sosode un accidente na altura di Tao Bao na Tanki Flip, ora cu un auto marca KIA modelo Sportage color cora a reverse riba e caminda grandi, sin mira un brommer biniendo di Tanki Leendert direccion Tanki Flip. E brommer tipo “motocross” a dal den e wantalodo di pasahero patras di e auto, lagando e motociclista herida atras.

Dor di e impacto, cu por mira claramente den e grabacion di e camara di siguridad por nota precisamente con e accidente a sosode. Locual a haya atencion ta cu e pia di e motociclista a kega pega den e taira patras di e vehiculo di dos wiel. Tabatin un pasahero sinta patras riba e brommer cu hunto a wanta e vehiculo para. Danki Dios e prome auto cu a yega na e sitio di accidente, y cu a mira con e accidente a sosode, a core baha cu su toolbox di bahul y a los e taira patras pa libera e victima for di con el a keda pega na su mesun brommer.

Auto a subi caminda diripiente den reverse…..sin wak brommer biniendo!

Posted by 24ora on Wednesday, May 20, 2020

Polis a activa mesora y a manda yama Brandweer y Ambulance pa por a brinda asistencia na e sitio di accidente. Ambos homber riba e brommer a pasa dor di un check-up pero finalmente a transporta e motociclista pa Hospital pa tratamento medico avansa. E tabata keha di dolor na pia y na nek.

Chauffeur di e auto a bisa nos cu e no a mira e brommer mes biniendo. Locual a pasa ta cu el a mira den spiel y a nota cu un auto tabata biniendo y a para pa dun’e un chens. E no a mira e brommer cu probablemente tabata core na e otro banda di e auto y hopi cerca di e auto, di tal forma cu esun saliendo den reverse no por a mir’e. E señora a sali den reverse y diripiente e brommer a bin dal riba dje.

Polisnan di trafico a presenta na e sitio pa investiga e accidente. Claro cu den e caso aki, tin imagennan di video di e camara di siguridad cu de facto, ta confirma locual ambos partido a bisa Polis caba. Daño material na e brommer ta bastante.