Auto a kima por completo den Daltonstraat

Polis a haya informacion cu tabatin un auto na candela den Daltonstraat na Ponton. Esey tabata pa mas of menos 1:30 am. Tabata trata aki di un Nissan March.

Pa ora cu polis a yega e auto tabata full na candela. N’e sitio polis a percura pa tene tur hende leu, ya cu por a scucha algun explosion chikito.

Segun un testigo, el a mira algun movecion sospechoso banda dje auto y despues di un rato a nota un hende homber core bay zuid. Despues di un rato e auto tabata full na candela.

Bombero n’e sitio a logra pag’e candela rapidamente pa asina evita c’e candela causa daño n’e edificio den cercania.

E caso aki ta bao di un investigacion.