Diadomingo mainta algo pasa di 7:30am a sosode un accidente serio riba e caminda principal na Savaneta. Un auto marca Mitsubishi, modelo Colt, color shinishi, cu number A-75197 y cu stuurwiel na man drechi, a baha caminda, basha un cura di cas abou y dal den un mata grandi den cura di e cas. Tabatin 4 herido y cu tres ambulance a transporta nan pa ricibi tratamento medico.
Chauffeur di e auto envolvi a bisa Polisnan na e sitio cu e no tin e auto mucho tempo. Desde el a cumpr’e, a nota cu e stuurwiel no ta bon. Awe na dado momento, e stuurwiel a lock y ni kico e chauffeur a purba haci, e no por a logra controla e auto mas y como tal a baha caminda sin spera y basha e cura di cas abou.
No mas cu algun dia pasa a sosode un accidente casi mesun sitio, pero solamente na e otro banda di caminda. Ta un caminda straigth pero pa un of otro motibo, autonan ta baha caminda y dal den e casnan riba e caminda grandi. E daño material ta mustra claramente cu tin exceso di velocidad tambe envolvi.
