Awe mainta net algun minuut prome cu 7or a sosode un accidente riba e caminda di Pos Chikito. Un auto marca Nissan modelo Sentra a dal un hoben menor di edad cu tabata crusa caminda bayendo scol. E tabata riba e caminda principal di Playa pa San Nicolas na altura di Rey Hing. Trafico tabata congestiona.
Na yegada di e patruya di Polis a topa e mucha drumi canto di caminda cu dolornan na curpa. E auto a dale duro pasobra e windshield di e auto a kraak y banda di e bumper tambe tabata ranca.
E hoben a scoge pa crusa riba caminda grandi y no uza e brug peatonal na Pos Chikito.
E Rapid Responder di Paramediconan di IMSAN a yega tambe mesora na e sitio. A cuminsa atende cu e menor pendiente ambulance.
Polis a pidi e chauffeur di e Nissan Sentra pa hala e auto for di caminda. Di e forma ey e trafico por a sigui pasobra tabata un orario cu hopi hende tabata sea caminda pa trabou of caminda pa scol.
