Un rato pasa, pa 6:45pm, un auto marca Honda modelo Accord color shinishi no a paga tino cu tin mucha ta hunga banda di caminda. E accidente a sosode riba caminda di asfalt pariba di e veld di Riverplate na Madiki. Un mucha di apenas 6 aña di edad a resulta victima durante e accidente aki, pa cual a pidi asistencia medico cu urgencia.
Bisiñanan a remarca cu constatemente tin automobilista ta core demasiado duro riba e caminda. Nan ta pidi pa DOW y Minister di Infrastructura, Marisol Lopez-Tromp, duna oido na nan peticion pa pone verkeer-drempels. Cartanan a bay caba pa e instancianan concerni.
E mucha a haya un bon susto y algun sla na curpa. Ambulance a transport’e pa Hospital. Polis di trafico a bin na e sitio tambe pa por conduci un investigacion riba con e desgracia a sosode. Den esey nan a scucha version di testigonan cu a scucha lastra di brake y a mira con e auto a dal e criatura.
