Muchanan cu gusta core bais, semper ta busca pa haci maniobranan manera hop. Diabierna den careda di 9:35PM a sosode un accidente dilanti New 88 Food Mart na Santa Cruz. Esaki tabata entre un pickup Toyota y un hoben riba bais.
E pickup tabata bay direccion Noord na momento cu e mucha homber tabata hop su bais. Na momento cu e mucha homber a stop di hop, e auto tabata di bay pas’e pero a alcanse. Polis a presenta na e sitio pa haya informacion di kico a sosode. E chauffeur a informa polis cu e bais no tabatin luz riba dje.
Ambulance tambe a presenta na e sitio, unda cu e paramediconan a atende e hoben. Despues di a chek e hoben, paramediconan a opta pa transport’e pa ricibi checkeo medico avansa na hospital. Daño material na e pickup tabata considerabel, mienstras cu e taira patras di bais a keda tur dobla.
