Autism Aid Therapy Centre mester bira aksesibel pa tur mucha outista aki na Kòrsou

214

Kòrsou tin alrededor di 1500 pa 2000 muchu outista di kual kada 10 mucha ku ta outista 8 ta mucha hòmber. Na 2018 famia Fernandes riba nan propio forsa a lanta e instituto Autism Aid Therapy Centrum pa duna nan propio yu ku ta outista i otro muchanan outista un mihó oportunidat pa desaroyá nan mes aki na Kòrsou.

E sentro aki ta hasi uso di e terapia ABA ( Applied Behavior Analysis) ku ta sumamente efektivo i ku ta keda duna pa therapistanan lokal ku amor i dedikashon. Tambe e sentro ta yuda mayornan pa detektá ku nan yunan ta outista. Mirando e resultado tremendo pa ku nan desaroyo di e kliente , e éksito aki ta traspasá frontera i e sentro ta wòrdu aserka dor otro paisnan pa nan profeshonalismo i dedikashon pa por asistí muchanan outista na otro sentro di outista den eksterior.

Autism Aid Therapy Centre tin e ambishon pa bira e sentro di terapia pa outismo den Caribe i alabes brinda e oportunidat pa inkluí nos muchanan outista den e tremendo terapia aki. Pero lamentablemente no ta tur mucha aki na Kòrsou ku ta outista por hasi uso di e terapia ku e sentro aki ta ofresé pa motibu ku e no ta keda kubri pa SVB. Mientras ku netamente dor di invertí tempran den desaroyo di e muchanan aki i logra hasi nan mas independiente di nos komunidat lo resultá mucha mas faborabel finansieramente pa nos sistema di salubridat den futuro. Komo èks Minister di Desaroyo Ekonómiko mi a hasi un petishon na Curaçao Airport Holding den luna di òktober 2020 pa krea un ruta VIP spesial pa e muchanan spesial ku ta outista i ku tin Down syndrom. Pronto e “ Ruta Spesial“ aki lo mester keda inuagurà despues di lunanan di trabou di e personal di CAP huntu ku mas organisashonnan.

Lastimamente ku pa motibu di COVID 19 esaki no por keda realisá mas tempran manera tabata plania na nos aeropuerto. Biahamentu ta un reto grandi pa mayornan ku tin yunan ku Down Syndrom i mas ainda pa esnan ku yu nan outista ku resultá den un situashon di stress enorme pa e muchanan i e persona mes ku tin esaki. Nos ta mira diferente aeropuertonan rònt mundu ya kaba tin e “Ruta Spesial “ aki pa e muchanan spesial aki. Kòrsou ku e “ Ruta spesial “ aki tambe lo wòrdu buta riba mapa kaminda nos aeropuerto tin “ Ruta Spesial “ pa muchanan/personanan spesial pa asina nan i nan mayornan por eksperensia biahamentu ku ménos strès. Di e manera aki hasi nos aeropuerto e Special Need airport den Karibe i mas importante hasi biahamentu pa nan tambe mas agradabel.