Austeridad: Parlamentarionan lo entrega 740 florin pa luna di nan salario

5505

Miembronan di e Fraccionnan di MEP y RED hunto a presenta recientemente un “Ontwerp Landsverordering tot verlaging van bezoldiging van Ministers, Leden der Staten en de Gevolgmachtigde Minister vanwege een nationale noodsituatie”. Ayera porfin e documento a yega Parlamento den forma oficial y ta pendiente su tratamento den e dianan nos dilanti. E proposicion ta pa e Parlamentarionan, Ministernan y Ministernan Plenipotenciario entrega 10% di nan salario y tambe nan Vakantieuitkering di luna di juni proximo, cu ta henter un luna di salario adiconal. De facto esey mes ta e intencion cu demas ambtenaarnan tambe, aunke cu esey no ta oficial ainda.

Ta propone pa Ministernan Evelyn Wever, Andin Bikker y Xiomara Ruiz-Maduro entrega e peticion na Parlamento pa su tratamento. Di acuerdo cu e proposicion, e cambio di e ley “Landsverordering tijdelijke verlaging bezoldiging politieke ambtsdragers” lo mester drenta na vigor cu forsa retroactivo dia 1 di april 2020 y ta vigente te cu dia 31 di december 2020, pues solamente pa 9 luna cub ta keda di e aña aki.
Gobierno ta considera den e proposicion aki na Parlamentom cu de facto Parlamento mes a traha y entrega na nan, cu e virus “Covid-19” a afecta e economia di nos pais di forma significativo y cu dor di esey e entradanan den caha di Gobierno a baha drasticamente. Consecuentemente, Gobierno ta hay’e obliga di baha su gastonan y den e cuadro aki mes a opta pa como medida di austeridad, pa reduci salario di politiconan den funcion.

Loader Loading…
EAD Logo Taking too long?

Reload Reload document
| Open Open in new tab

Download [1.97 MB]

E ley, articulo 1, ta bisa textualmente cu “Como desviacion di articulo 4 di e Landsverordering voorziening politieke ambtsdragers (AB 2010 no. 90) lo reduci salario di e politiconan den funcion cu 10%”. Articulo 2 di e ley proponi awo na Parlamento ta bisa: “Como desviacion di articulo 13 di e Landsverordering voorziening politieke ambtsdragers (AB 2010 no. 90) lo no paga ningun bijzondere uitkering den e aña calendario 2020 na politiconan den funcion. 

Mester menciona cu no mas di algun dia pasa, Parlamentario Alan Howell a entrega un mocion hunto cu Parlamentario independiente Daphne Lejuez, pa tur Minister y Parlamentario por entrega Afl. 1.000 pa luna for di nan salario. E dia ey MEP y RED a cataloga e mocion como populista y a bisa cu nan lo entrega HOPI MAS cu esey, locual no necesariamente ta berdad. Specialmente si lo elimina e prima di vacacion na juni for di tur empleado publico, e ora e politiconan no a entrega nada mas. Cu lo baha nan salario cu 10% ta menos di locual Howell a sugeri como cu tin un diferencia den locual ta salario bruto, como tambe loke ta salario netto, pues kico Bo ta bay cas cune den Bo man.

Salario bruto ta un cos, pero salario “netto” di un Minister ta Afl. 9.300,= pa luna mientras cu un Parlamentario ta haya riba su cuenta di banco e suma di Afl. 7.400,= mensualmente. Cu e proposicion di cambio presenta dor di e Parlamentarionan di MEP y RED, nan lo entrega solamente 740 florin pa luna pa e causa, cu ta como 25% menos di locual e Parlamentario di POR a presenta y cu a haya sosten di Lejuez den Parlamento y di e fraccion di AVP tambe.

Pronto lo mester presenta e ley aki den Parlamento y lo mira con comunidad lo tuma e medida di austeridad aki, specialmente pasobra ainda Gobierno no a menciona e medidanan cu lo tuma pa e empleadonan publico mes. Locual si ta sinti den comunidad ta e medidanan cu comercio a tuma, den cual miles di empleado a bay cas sin pago, pendiente normalisacion di e crisis cu nos pais ta pasando aden dor di caida abrupto di turismo. Gobierno a menciona awe cu 5 mil empleado a meldo na FASE caba den e ultimo dianan pa pidi pa ricibi 950 florin pa luna como compensacion debi na perdida abrupto di entrada. Minister Glenbert Croes mes ta kere cu e cantidad lo alcansa 25 mil empleado. Ainda falta pues pa menciona si lo reduci salario di empleadonan cu cuanto porciento pa luna, aunke cu e decision di Parlamento aki ta pone un blafon pa ambtenaar tambe pasobra di ningun forma por reduci nan salario mas cu esun di politiconan!