Aunke hopi a bay contra, plannan tecnologico a duna su fruto na KIA

Tin un tema cu sigur ta di importancia, cua ta KIA. Por a tuma nota cu intentonan ta continua pa haci cosnan robes pa logra yega cu cosnan robes den prizon di pafo. Pero a ripara tambe cu Husticia ta percura pa materialnan tey y e prome dianan caba cu ekipo a wordo poni, a duna su fruto.

Minister Arthur Dowers a splica cu nos ta biba diariamente cu hendenan cu tin un mente maligno, cu nan ta haci tur esfuerso pa mina e autoridad di e pais y siguridad di e pais. Lamentablemente tin cu bisa cu nan ta haya hopi sosten di hendenan den politica, cu pa hopi aña a bringa Gobierno pa tuma e pasonan necesario.

Hustamente ora cu kier bay implementa cierto plannan tecnologico, pa yuda sostene e siguridad di nos prizon, hopi di nan a bay contra. A para duro y awe por mira cu e proyectonan aki ta duna resultado. Na varios ocasion a detene diferente persona y detecta traficacion di cosnan ilicito den nos institucion, danki logicamente na e personal cu ta traha, tanto di prizon como di CEA y tambe door di e sosten cu tin di tecnologia.

E grupo cu a purba e ultimo aki, ta bao di investigacion. Tin di compronde cu ora cu autoridad a reacciona riba nan y a los tiro den nan direccion, of a lo menos a los tiro pa spantanan cu a spanta di tal indole cu nan a causa daño na nan mes, nan ta bao di investigacion y a trece cantidad di cos cu no ta desea den prizon, entre otro telefon, alcohol y droga y a wordo confisca y distrui. Ta spera cu por yega hopi cerca na esnan di paden cu ta traha hunto cu e gruponan aki pafo, cu ta trece e cosnan aki den prizon.

E minister ta sigur cu e esfuersonan ta wordo haci cu autoridad pa duna bon resultado y ta mira tambe cu e grado di desesperacion cerca e hendenan aki ta bira mas grandi.

Por mira e intentonan cu nan ta haci cada biaha ta mas creativo, pero ta logrando pa brinda suficiente proteccion contra di loke nan ta haci. Por bisa cu no lo logra 100% pero si ta haci 100% di esfuerso.

Loke a logra, nunca antes a wordo logra y ta hopi a wordo inverti den diferente team, den diferente ekipo, diferente personal cu awe por bisa cu ta riba e tremendo caminda, segun e mandatario.