For di e “uitvoeringsrapportages” cu Minister Xiomara Ruiz Maduro a publica recientemente riba website di Gobierno di Aruba, por nota cu tin un aumento explosivo di gasto den Serlimar desde cu Minister Otmar Oduber ta encarga cu Serlimar. E gastonan a aumento di 18,4 miyon florin den 2016, pa 25,4 miyon den 2017, pa 32,1 miyon den 2018 pa un pronostico di 39,4 miyon florin den 2019. Den otro palabra, e gastonan di Serlimar ta pronostica di ta mas cu dobel e aña aki cu den aña 2016, un aumento di 21 miyon florin.
E “uitvoeringsrapportages” aki a bira publico 20 di juni y 26 di augustus ultimo ora cu Minister di Finanzas, mr. Xiomara Ruiz Maduro a reanuda e publicacion di e raportahenan cu Ministerio di Finanzas ta manda pa CAFT cada pasa 3 luna. For di e mesun rapportahe aki por nota tambe cu Serlimar ta un di e poco instancianan gubernamental parti di e sector colectivo cu ta raporta perdidanan grandi kwartaal tras di kwartaal.
Pa e prome 6 lunanan di 2019 Land Aruba, AZV, SVB y ATA tur a raporta surplus, mientras Serlimar, Universidad di Aruba, y Stichting EPB a raporta perdidanan. Universidad di Aruba y EPB a raporta perdidanan relativamente abou di 330 mil y 238 mil respectivamente, mientras Serlimar, a raporta perdida di 3,2 miyon florin Arubano.
Pa aña 2018 Serlimar ta pronostica di perde 5,2 miyon florin, mientras cu na 2017 y 2016 Serlimar a raporta un perdida di 4,8 miyon florin y 1,9 miyon florin respectivamente. Tur esaki por ta motibo tambe cu Minister Otmar Oduber, probablemente bou presion di Minister di Finanzas mr. Xiomara Ruiz Maduro, ta busca manera di subi e entradanan di Serlimar drasticamente. Esaki door di aumenta e impuestonan cu ciudadanonan, empresarionan y turistanan tin cu paga como tambe door di elimina competidonan di Serlimar por medio di un ley cu awor ta na Parlamento pa wordo trata. For di e “uitvoeringsrapportages” por constata cu en todo caso bahamento di gasto no ta parti di e strategia di e Minister encarga.
