Entrante dia 1 di juli 2018, Aruba Airport Authority ta aumenta nan “Airport Tax” cu no menos di 40%. Esaki ta un aumento barbaro pa e servicionan cu pasaheronan ta haci uzo di dje ora biaha. Aeropuerto a anuncia algun siman pasa cu e aumento ta pa por cubri e gastonan, presupuesta na 200 miyon dollar, pa ehecuta e proyecto “Gateway 2030”.
E servicionan cu awor lo aumenta, cu den boca di pueblo nos conoce como “Airport Tax” ta encera de facto e “Passenger Facility Charge” cu awor ta costa cada pasahero US$23, “Security Surcharge” cu ta costa cada pasahero US$ 3.00, “General Usage Charge” cu ta costa cada pasahero US$ 8.25 y un “Special Facility Charge” cu ta costa cada pasahero US$ 3.25 pa asina hunto suma na US$ 37,50 pa cada pasahero cu ta biaha pa Merca. Ta referi na Merca pasobra e tarifanan ta varia pa pasaheronan cu ta biaha pa Boneiro, pa Corsou y Sint Maarten y pa otro destinacionnan cu no ta Merca.
E aumento di 40% ta specialmente pa e destinacion mas popular, esta Merca unda awor e costo ta subi di US$ 37.50 pa US$ 52.50 (aumento di US$ 15.00) entrante 1 di Juli 2018. Por menciona cu “Airport Tax” pa Boneiro ta US$ 20.00, pa Corsou y Sint Maarten ta US$ 34.25 y pa tur otro destinacion (por ehempel Europa y Latino America) e ta bira US$ 47.25 pa cada pasahero.
