Aruba Marine Mammal Foundation a recibi melding for di Directora di Parke Nacional Arikok Natasha Silva cu un turista a senyala un dolfijn chikito morto den awa na Dos Playa.
Cu asistencia di PNA Ranger Robert Martha, kende a trese tambe a baby dolfijn tera, y PNA Hoofd Ranger Salvador Franken, Giolina Henriquez (AMMF) a documenta e caso ; a tuma muestra for di e curpa pa hasi analysis genetico; y a dera e baby tonino pa conservacion di su huesonan.
A resulta di ta trata di un Stenella coeruleoalba (Striped dolphin) di 1 meter di largura, cu a nace morto of fayece casi di biaha. Su “dorsal fin” (e fin riba su lomba) tawata dobla ainda. E fin aki di un recien naci ta hanya su posicion vertical door di e mocion di awa, despues di a landa 2-3 ora.
E tonino morto tawata tin su “whiskers” ainda, e cabei nan cortico riba e snuit, cu ta cai den 3-4 dia despues di nacimento. Tambe e plooinan fetal tawata visible ainda y tawata tin masha tiki sanger, y e lombrishi tawata un buraco habri.
Gestacion di un fetus tonino tin averahe di 12 luna, ta nace cu rabo prome, y ta wordo yuda pa su mama pa landa bai superficie pa sinya hala rosea. E ta tuma lechi di mama te cu 18 luna, Adultonan ta sambuya pa come piska y squid na profundidad di 200-700 meter. E yui ta biba cu e mama te na un edad di 3 pa 6 anya, y e averahe di largura di bida ta 55 pa 60 anya. Un adulto tin un tamanyo di mas o menos 2.6 m y ta pisa entre 100-130kg, mientras e largura typico di un recien naci ta 1m. Nan ta comun y habita laman profundo den gruponan di cien pa mil hunto.
E Stenella cureaolba ta hopi bunita, e tin un disenyo di strepi cada banda y ta hasi hopi acrobacia riba laman, bulando foi awa masha halto mes. AMMF ta recibi hopi melding di sighting riba laman grandi di grupo di especie aki.
Esaki ta di tres caso di Striped dolphin encontra morto na costa di Aruba, e otro dos tawata ta na California Lighthouse y na Baby Beach; y di e anya aki e ta di 4 melding di tonino baby den problema na costa di Aruba, di cual 2 tawata bibo,
un den waf di Playa y e otro den waf di Citgo.
Segun datos colecta, desde 1998, pa AMMF, Aruba su awanan costera ta un refugio pa tonino, especialmente pa duna luz y ora di necesidad pa recuperacion. Especienan observa cu regularidad cu tin Aruba como refugio ta Tursiops truncates (Bottle nose), Steno bredanensis (Roughtoothed), Stenella attenuata (Atlantic spotted), Stenella longirostris (Spinner), y Stenella cureoalba (Striped).
Por fabor, tene cuenta y yuda conserva nos populacion di tonino salvahe. Sea cauteloso como landador, buceador, capitan di boto. Nunca trata di duna nan cuminda. Si nan mes no ta acerka bo, nunca persigui nan, mantene distancia di nan, especialmente si nan tin baby den e grupo. Nunca tira sushi of plastic den laman of laga atras den laman un pida di linya of net di pesca. Si bo encontra un tonino riba costa, sea asina bon di meld na AMMF 5924333/5924048.
