Diasabra anochi alrededor di 8:15 pm varios unidad di polis a bay den area di Balashi pa atende cu un conocido di polis. Ta trata di Jair Roos, un homber cu polis ta considera peligroso. Roos a menasa hende den e area di Balashi y a bandona prome cu polis a yega. Polis a busca rond den e area pero no a topa cu ne.
Jair Roos den pasado a agredi un agente den funcion den mesun area. Team di aresto a yeg’i deten’e un monton di biaha, mirando cu tabata sospecha cu e tin arma di candela den su poder.
Mirando cu e ta un bringado di MMA, a opta pa despacha varios unidad di polis. Despues di varios rato, a logra topa cu Roos scondi den cura di hende na Balashi.
Den un forma tactico polis a rondon’e y deten’e mesora. Aunke cu el a resisti, tabatin suficiente agente pa domin’e. A transport’e pa ward’i polis caminda e tin di bay duna cuenta riba su acto. Manera a menciona, no ta prome biaha cu polis ta deten’e pa menasa.
