Pa mas o menos 8:30pm a mobilisa diferente unidad di Polis den direccion di Savaneta pa un atraco arma. Na yegada di autoridad na Chun Ho Supermarket den e mesun caya di Ex Hotel Roys bay ariba, a tende di testigonan cu 3 persona bisti na preto y cu cara tapa a drenta e luga, ranca dos caha di placa bay cune, pasa man pa cigaria, carchi telefon y algun otro cos mas y despues move riba scooter.
E trio tabatin arma di candela den man y por lo menos un di nan a agredi e empleado di nacionalidad Chines na su cabes cun’e. Despues di e sucedido e grupo a huy riba scooter direccion di Mabon.
Si analisa bon, esaki ta e mesun modus operandi uza mas o menos dos siman pasa ora cu tambe un trio a tira dos atraco tras di otro, un na Pos Chikito y otro na Cura Cabay.
Polis a mobilisa diferente unidad y a manda ambulance na e sitio pa atende cu e victima. Cualkier persona cu por a mira algo of sa mas of por a nota movecion straño den Mabon, por yama Polis mesora. E suma cu a horta ainda no ta conoci pa nos.