Atracador arma a purba drenta cas cu mucha

Diahuebs anochi algo prome cu 10:00pm a sosode un caso serio na Tanki Leendert. A pidi asistencia di Polis pura pasobra tin un atraco tumando luga na un cas. Na yegada di Polis a topa cu e famia, cu a declara cu esaki ta di tres biaha cu atracador ta presenta na nan cas.

Dos biaha a comete atraco caba na mesun cas. Diahuebs anochi e menor di edad tabata paden y a bay mira kende tabata na porta. El a mira un homber full na preto cu cara tapa y arma den su man.

El a core bay y bati alarma den cas. E atracador a sinti su mes den un situacion incomodo y a core bay patras di e cas y subi un palet y asina bula e cura di e cas huy.

Polisnan a tuma e caso masha na serio. Muchanan den e cas a pasa den un susto masha grandi. A avisa cuerpo tecnico pa bin coy fingerprint riba e glas di porta unda e atracador arma a bin para.

E famia a keda preocupa y muchanan basta spanta. E biaha aki e atracador no a logra horta nada.