Diabierna atardi, e atletanan di Special Olympics a yega for di Abu Dhabi. Y nos tin cu bisa cu nan a sa di destaca y a trece varios medaya cas, haciendo nan automaticamente nos heroenan cu a representa nos dushi isla na un pais asina leu.
Durante nan yegada, minister di salubridad, turismo y deporte, Dangui Oduber, a duna nan un caluroso bon bini, cu palabranan di elogio pa e presentacion asina grandi y bunita.
Prome minister, Evelyn Wever-Croes, tambe a dirigi algun palabra. Ta un total di 9 medaya cu a logra na Abu Dhabi. Ta habilidadnan special cu e atletanan aki tin, cu a sa di representa Aruba manera debe ser.
Dello Gomez di Digicel, a expresa di tabata contento di a mira e atletnan bin bek for di exterior. A ricibi nan en grande, manera cu ta ricibi tur nos atletanan cu ta resalta den exterior.
Palabra di danki, aprecio y admiracion tambe ta bay na tur famia cu a sostene e atletanan. Pasobra den ningun deporte, sin e sosten di e famianan, no por a logra e prestacionnan cu a wordo logra.
Nan ta sumamente orguyoso di a sostene e team Arubiano di Special Olympics cu a yega for di Abu Dhabi.
Na tur pais cu Digicel tey nan ta sponsor e team di special Olympics y tambe nan sa organisa un evento special pa asina tur e atletanan por bin hunto y pasa un rato ameno.
Tuyo Werleman, presidente di SVGA, apesar di tabata cansa, a splica cu a sa di participa hunto cu atletanan di 190 pais, cu den un siman mester a draai un programa hopi pisa y tabata tras di otro. Tabata tin atleta cu mester a hunga 3 wega pa dia pa por a cumpli cun’e.
Apesar di e cansancio nan tabata sa di cumpli. Tabata un reto pa por a bay. Pero Dios ta stima e hendenan special y na ultimo momento a manda basta ayudo.
Werleman a gradici henter e comunidad, e sponsornan, cuna ultimo momento cu a yuda. Tambe na e mayornan cu a coopera en grande.
Werleman ya a yega di bay cinco biaha cu un grupo di atleta. El a yega di forma e prome grupo di atleta di Aruba cu a yega di biaha, unda cu nan a bay Madrid, pa e weganan di Paralimpics cu 6 atleta. Awo nan a bay cu 23 Abu Dhabi.
Tambe a gradici prensa cu a carga Special Olympics, pasobra sin prensa, sin comunidad sa kende nan ta y kico nan ta haci, nan no lo ta ningun caminda.
