Mirando cu e di dos edicion di e Weganan Sur Americano Hubenil ta dentro di dos luna na Santiago de Chile, varios di nos atletanan cu lo atende e dicho weganan ta probecha di e oportunidad di realisa algun preparacion extra.
E mayoria ta atende camponan di entrenamento den combinacion cu competencianan di nivel continental of mundial. Mas cu claro esaki ta yuda na midi e nivel di cada atleta net prome cu e Weganan Sur Americano Hubenil. Un delegacion di judo consisti di e atletanan Sofia Petrocchi, Rayenne Ridderstap, Yuri Koffy, Brandon Wong, Ethan Quandt hunto cu coach nacional Fiderd Vis lo permanece pa tres siman pa ser exacto di 23 di juli pa 20 di augustus den e Centro di Alto Rendimento di Chile unda nan lo entrena hunto cu e seleccion di dicho pais. E campo di entrenamento aki lo bay ta uno intenso di aproximadamente 20 ora pa siman. Cu esaki tambe e atletanan por cuminsa na aclamatisa cu e tempo di Chile.
Na banda cu nos atletanan di Judo ta atende e campo di entrenamento nan lo competi den dos diferente competencia di nivel halto. Prome nan lo competi den e World Championship Cadete di Judo cu lo tuma lugar na Chile mes y despues nan lo biaha pa Ecuador unda cu nan lo competi den e Campeonato Sur Americano de Judo esaki e dianan 16 di augustus pa 19 di augustus. Un danki sigur na Lotto, e Loteria di Aruba pa medio di Comision di Subsidio cu a yuda subsidia e biahe y campo di entrenamento di nos atletanan di Judo na Chile. Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e comision di subsidio.
