Despues di a permanece pamas cu un luna den exterior, dialuna atardi e atletanan di Brazil taekwondo Stichting a yega bek na nan isla natal.
Na aeropuerto e delgacion a wordo ricibi pa Presidente di St. Fundacion Lotto pa Deporte, sr. Di Stefano Wernet RA kende tabata tin palabranan elocuente pa e forma con Brazil Taekwondo y Sr. Alberto Klaber ta representa Aruba den exterior.
“Ministro di Deporte Dr. Alex Schwengle & Directiva di Lotto ta masha contento & orgulloso di e forma cu Brazil Taekwondo ta bin ta trahando pa e deporte di taekwondo specialmente pa su organisacion y e atletanan. Sr. Klaber ta un hende transparente cu ta duna relato con e subsidio ricibi a wordu gasta y ta habri pa dialoga ora mester bay representa Aruba den exterior. E club Brazil Stichting ta un ehempel pa otronan. Nan mes hopi biaha ta recauda fondo sea ta carwash, bbq, ect pa asina yega na e fondo nan nesecario pa realisa nan meta. Manera JFK semper a bisa no puntrami kiko mi pais por hasi pami pero kiko ami por hasi pami pais”, Sr. Wernet a conclui.
Luna pasa e cuater atletanan di Brazil Taekwondo Stichting, Jourdé Klaber, Joshua Klaber, Záyhon Klaber y Danon Delamore a biaha pa Sur Korea unda nan a competi den e Open di Korea.
E campeonato di Korea tabata un G2 unda bringadornan di taya y prospectonan grandi di cada pais rond mundo a paticipa na e torneo aki. Tambe e atletanan di Aruba a atende un campo di entrenamento cu tabata bou encargo di e ex-campeon mundial di taekwondo y actual entrenador Henk Meijer cu den pasado semper a bishita Aruba. Durante di e campeonato di G2 na Korea e propio Henk Meijer a guia e cuater atletanan di Aruba den e diferente combatenan. Mester bisa cu nos muchanan a presta den tremendo forma unda e resultado ta papia pa su mes. Tur cuater atleta a regresa cu premio unda Jourde Klaber a gana medaya Oro, Zahyon Klaber a gana medaya di Oro, Joshua Klaber a gana medaya di Plata, Danon Delamore a gana medaya di Bronz.
Un pabien grandi sigur na Brazil Taekwondo Stichting cu e resultado satisfactorio na Sur Korea.
