Greg Nance ta un coredo di marathon y a bin Aruba pa celebra su di 10 aniversario cu el a sali fo’i bicio di bebida. Tambe p’e explora Aruba pa por core dos careda na pia.
E ta conta cu e gusta core desde cu e por corda. Y durante di varios aña el a bay mas leu. Den e ultimo 10 aña e tabata un coredo di marathon (ultra marathon runner).
E ta conta cu inicialmente el a cuminsa core bek como un manera pa stop di bebe. Nance tabata bebe demasiado hopi alcohol. Na december 2011, el a bebe su ultimo alcohol y a efectua su prome ultra marathon.
Y awo e ta na Aruba pa asina celebra su di 10 aña sin alcohol y como un coredo di marathon. Pakico a scoge Aruba, pasobra e tin un reputacion mundialmente famoso y ta un luga bunita. E ta un ‘melting pot’ di hopi cultura, bunita beach, paisahe increibel y cu costa fabuloso.
Ta p’e motibo aki mes Nance t’ey pa asina explora e costa. Awo cu ta winter na Seattle fo’i caminda e ta, el a opta pa bin Aruba, unda cu e ta haya cu ta hopi bunita.
Nance a comenta cu ya caba el a haci dos careda grandi. El a core fo’i e cuebanan di Fontein. Tambe el a subi e cero di Jamanota, cu ta e sero di mas halto mas lihe posibel.
Dos dia despues, riba dia di aña nobo, el a bay Sero Colorado, caminda el a core 23,5 miya (36 kilometer mas of menos) te cu e faro na Westpunt. (California Lighthouse).
Pa un cobertura mas amplio lesa e edicion di TREMPAN di mañan.
