Siman pasa ATIA a organisa un reunion entre representantenan di ASTEC, WEB, APA y e liñanan di transporte maritimo pa ricibi un update y discuti riba e problemanan cu e huma di, entre otro, WEB a bin ta causando pa mas cu un aña caba.
Mirando e efecto negativo y consecuencianan pa comercio cada bes cu e trahadornan mester para nan trabou pa via cu e huma ta afecta e trahadornan, ATIA a dicidi di intermedia y trese e companianan envolvi desde un principio na mesa pa asina purba yega na e causa di e problema y na solucionan sostenibel pa tur partido. Desde 2018 e proceso aki a cuminsa y aunke e problema no ta completamente soluciona ainda, por bisa cu ASTEC, WEB y APA ainda ta trahando pa yega na un waf cu por brinda un servicio confiabel, consistente y eficiente.
Algun di e pasonan cu a wordo tuma dor di WEB pa por trese alivio den e situacion aki ta entre otro e cambio pa un fuel oil cu ta contene un porcentahe mas abou di sulfur, e uso di diesel enbes di gasolin pa cende y paga e motornan, y “root blast” necesario diariamente cu awor ta wordo hasi prome cu 6or di mainta y despues di 6or di atardi. Ademas, WEB a cumpra 6 motor nobo cu lo yega y wordo instala na mei 2020, cu ta garantisa 25% menos di emision.
Varios monitor a wordo instala riba e tereno di WEB y tambe na ASTEC pa controla e calidad di aire. ASTEC y WEB ta trahando riba un protocol segun normanan Europeo pa cu calidad di aire y cu lo claramente stipula ki ora ta safe pa traha y ki ora ta justifica pa un paro di trabou tuma luga.
Un punto importante cu e representantenan di e companianan di transporte maritimo a trese dilanti ta cu ta importante pa gobierno bin cu leynan y normanan pa calidad di aire pa cualkier compania cu ta of kier establece su mes den e area industrial di Barcadera pa asina evita e problemanan cu e ta causa pa e trahadornan di no solamente e waf pero tambe e barconan y otro companianan den e area.
E proceso di yega na soluciona e problema aki, tawata un reto grandi, pero ATIA ta contento di por a trese e partidonan concerni hunto pa dialoga y purba di yega na solucionan concreto. Aunke ainda no a yega caminda mester ta, ta importante cu tur esfuerso ta enfoca riba e mesun obhetivo.
