ATIA riba ayudo di Hulanda: Ta pospone un decision cu ta inevitabel

1627

E intentonan di Gobierno pa busca fiansa otro caminda, a cay di sorpresa pa Aruba Trade & Industry Association (ATIA), asina Michelle de Groot presidente di e organisacion a duna di conoce. “E tabata un sorpresa pa tur hende, incluyendo Hulanda.

E hecho cu Gobierno a dicidi di busca un solucion otro caminda, ta mustra manera cu ta pospone un decision cu en realidad ta inevitabel. “Nos no sa si esaki ta deseabel, pasobra ta bay fia toch na un porcentahe mas halto di loke Hulanda ta ofrece. Nos no ta na e punto di acepta e rekisitonan cu Hulanda ta pidi aworaki. Pues mester sigui cu e negociacionnan. Si e ta e miho opcion, ATIA no por bisa esey ta e caso,” de Groot a expresa.

ATIA riba ayudo di Hulanda: Ta pospone un decision cu ta inevitabel

ATIA riba ayudo di Hulanda: Ta pospone un decision cu ta inevitabel

Posted by 24ora on Wednesday, September 16, 2020

Loke cu ATIA ta haya lamentabel ta cu a bin tende of lesa di e intencion di Gobierno den medionan di comunicacion. No a logra haya reunion ni cu Prome Minister of cu otro instancia di Gobierno cu por duna nan mas informacion di kico e prestamo ta encera. “Nos sa cu no ta cla ainda y nan no por duna tur detaye, pero si nos tabata desea di tin poco mas bista con a yega na e punto aki.”

ATIA a tuma nota tambe cu Gobierno a informa recientemente e cambionan cu Hulanda a bin cu nan den e condicionnan pa haya ayudo. Aruba ta bisa cu Hulanda no a consulta  prome cu a pone e condicionnan adicional, mientras cu Hulanda ta bisa cu si a consulta. “Esaki ta indica cu e negociacion ta bay den un ambiente cu no tin confiansa entre e dos paisnan. Esaki nos ta haya lamentabel y ta algo cu mester traha riba dje. Mester tin confiansa di ambos banda, pa yega na un negociacion cu ta husto  y un proposicion cu tur dos por biba cu ne.”

E hecho cu no ta yegando na un acuerdo tin consecuencia cu Gobierno no por cumpli cu su pagonan pero tambe pa henter economia di e pais.