ATIA contento cu desaroyo riba waf y dedicacion di partners pa soluciona esaki

ATIA, a base di reunionnan cu stakeholders, a keda follow up continuamente riba e proceso di mehora e condicionan di trabou riba nos waf di Barcadera. E situacion cu tawata reina riba waf na Barcadera a causa basta daño na comercio di Aruba y a pone cu nos waf di Barcadera a cuminsa perde credibilidad pa motibo di un gran cantidad di paronan ocasiona door di e huma cu ta sali for di WEB.
ATIA conhunamente cu stakeholders, incluyendo gobierno, na bienestar di nos economia y salud di esnan laborando riba waf, a pone como meta pa soluciona e problematica aki, mehorando y restaurando e confianza cu mester tin riba nos waf, alabes mehorando e condicionnan di trabou di trahador y di tur esnan cu ta haci uso di nos waf na Barcadera.

Durante un reunion recien ATIA a ricibi prueba cu nos compania estatal WEB a haci un gran trabou den e proceso di mehoracion di e situacion.
WEB ta start su motornan principal cu diesel y tambe ta “rootblast” mainta masha trempan y anochi pa asina minimalisa e cantidad di sulphur cu ta bai den aire durante oranan di trabou.
Tambe WEB por a mustra cu e calidad di e Heavy Fuel Oil cu ta usando awe ta contene casi 50% menos di sulphur cu e HFO cu tabata usa algun luna atras. ATIA kier a gradici tur partido cu a participa den e decision pa mehora e proceso aki considerablemente.

Tin un cooperacion estrecho andando entre WEB, ASTEC y APA pa yega na normanan standarisa pa midi e calidad di aire y tambe ta papiando pa usa e norma di mas stringinte manera AQI. Ta hopi importante pa e norma cu lo bai usa ser bon determina pa asina tur partido bai di acuerdo ki ora e percentahe di cierto substancia den aire ta mucho halto y ki ora e ta normal.

Tambe ta importante pa menciona cu desde juni/juli ora cu e situacion tawata hopi delicado y tawatin masha hopi paro den e cadena di funcionamento di waf, cu ta mustra un mehoracion importante den esaki den e ultimo 2 lunanan, na unda cu e proceso di baha container a mehora substantialmente.

E waf di Aruba na Barcadera ta un di nos adernan economico principal y ATIA ta contento cu WEB, ASTEC, APA, gobierno y sindicato a pone di nan mes pa recupera e confiansa cu nos waf mester di dje y cu ta asina importante pa nos economia.

Tanto gobierno como WEB a anuncia cu tin un projecto importante di motornan RECIP na caminda, cu unabes implementa lo elimina e problematica di sulphur den nos medio ambiente casi completamente y alabes move Aruba den un direccion pa usa cientos di bari menos di fuel pa dia, poniendo Aruba asina riba mapa como pais lider den sostenibilidad.
ATIA cu atencion ta en espera di inicio pronto di e proyecto tan importante aki pa nos pais, medio ambiente y economia.