Un storia admirabel di perseverancia y dedicacion na cultura y historia di Steelband riba nos Isla, despues di a mira su esfuerso bay perdi den man di otronan cu no a traha pa locual cu nan a bay cun’e. Awe nos ta conta e storia di con Friends & Family Steelband di Noord a nace y ta yena e Bario di orguyo na momento cu nan pasa un biaha mas den paradanan di carnaval.
Hose Riderstaat miho conoci como “Sebi” tabata traha contratista cu DOW y ta conta nos e storia di e Steelband di Noord cu antes el a lanta bou di e nomber Noord Star Steelband y cu awo despues di hopi contra tiempo ta cuminsa su trayectoria bou di su nomber nobo Family & Friends Steelband.
Sebi Riderstaat sinta na Calbas n’e sede di e Steelband ta conta un poco di con e Steelband a inicia. Tur cos a cuminsa na añanan ‘94 / ‘95 mientras cu e tabata trahando riba un veld deportivo, pa ta mas specifico riba veld di Matadera. Akinan el a topa cu Meneer di scol Mario Tromp di scol St Aloysius cu a duna nan un chens pa warda nan material den un “mangashina” na su cas. E bunita sorpresa di bin topa/dal den un First Pan riba su stand bunita warda.
Mesora Sebi a haci e pregunta si Mario ta bende e pan. Mes momento el a contesta cu no, pero si ta desea por haya un set cu Meneer Betto Figaroa tin warda na St Aloysius School cu ta poni den e bañonan. Principalmente pasobra nan tabata forma un peliger pa e muchanan. Nan tabata stiwa un riba otro te den laira y tabata tin miedo pa nan cay riba e muchanan ora nan usa baño, ta locual Sebi ta conta.
A bay cerca Meneer Betto cu di biaha a bisa cu si nan kier nan por bay cu nan.
A tuma nota e tempo ey cu te asta a cuminsa usa e bass nan como bari di sushi. A tuma over e Pannan y a haci un intercambio, a duna nan bari di sushi di berdad na nan luga.
Hunto cu ( defunto ) Roche Tromp e tempo ey, a cuminsa traha riba e garoshi y lanta e steelband pa asina subi caya. Pa engrandece carnaval di Noord. “Nos a subi caya cu tur e barinan den e garoshi sin tocado ( bashi ) y na caminda espontaneamente e tocadonan mes tabata acerca y pasa tras di e Pan y cuminsa toca” ,Tiki tiki a pasa piki hende band’i caminda y asina e Steelband a forma.
Esta un bunita recuerdo.
A yega temporada cu mester a drecha tur cos bek pa e siguiente aña.
A papia cu Ovito Tromp di Centro di Bario Noord y el a ofrece, cu si acaso haya un hende pa traha bari e ta dispuesto pa sponsor y paga pa e trabou, di cual nos ta masha agradecido, ta locual Sebi ta conta. A busca un hende di Weg Fontein cu yama Fayang cu tambe ta defunto awe, cu a bin traha e barinan. E trayectoria pa traha nan tabata largo, mester a busca Fayang y hibe bek tur dia te Weg Fontein y asina a keda te ora a lanta e steelband por completo.
Despues mester a pone nomber.
Un amigo cu yama Betto Farro cu tin un car rental cu yama Noord Star Car Rental a ofrece cu si nos kier nos por haya e nomber y na mes momento tambe a duna nos un sponsor pa coy comei chikito eynan.
A sali masha bunita, Prome aña a bay masha bon. Freddy Tromp a coy e mando di e steelband Noord Star Steelband, a cumpra set di bari di chroom y a benta esunnan bieuw afo den cunucu. E ruman di Roche a contacta Sebi y informe, cu si kier e por bin coy e barinan. Cual el a haci y asina a lanta e steelband atrobe.
Tin cu busca sponsor
E palabra “no” semper bo ta cana cun’e, ta e “Si” tin cu busca. Despues di varios aña cu diferente sponsor cu a yuda nos, awe por bisa cu e Steelband ta bek riba pia consistiendo di dies integrante cu orguyosamente ta subi ruta di carnaval y duna nan curason na e pueblo pero esun di Noord muy en particular.
Cultura y tradicion lo keda bibo den man di nieto y hubentud cu lo rescata nos steelband y su tradicion, semper y cuando nan pone di nan banda manera nos a haci, Sebi a bisa.
Aunke el a cay hopi y e nostalgia ta grandi di mira bek e steelband nan di tur parti di nos Isla, manera entre otro esnan di San Nicolas cu tabata traha nan steelpan y bin abou pa toca mes un dia, como tambe di Seroe Janchi caminda Sebi a toca hopi aña y ta e Bario cu el a bin di dje.Un historia di mas di 50 aña pasa caminda cu ta hopi steelband a nace y caminda Sebi como mucha tabata bay acompaña nan. Tristemente cu fayecimento di un di e rumannan e steelband tambe a caba.
Despues di 25 aña a bin bek cu steelband na Noord y ta yena tur hende di orguyo pa mira un biaha mas un steelband pasa y sigur ta yena e curason di alegria y ta aprecia cada aplauso.
E ta awo den man di nos generacion nobo pa continua cu e bunita bendicion musical aki cu a haci hopi curason contento di mira bek. Un danki special ta bay na ATCO Concrete pa duna nos e oportunidad di conta un poco di e historia, pero mas importante di sostene nos Cultura y brinda nos e satisfaccion grandi di subi caya y laga nos Steelpan resona.
