Atan Lee: Kico ta autonomia? Nos ta autonomo?

Atan Lee
Atan Lee

Kico ta autonomia? Esey ta ora un persona of pais por para riba su mes y tuma su propio desicionnan. Pa un persona of pais por tuma su propio desicionnan, e mester tin fondo (placa). Grita, sapatia, insulta, ofende, critica, yama pa colonisado, etc, no ta yuda na nada. Mester wak den propio cas prome kico a bay robes cu ya for di 6 aña pasa Aruba a perde su autonomia, ora cu a pasa e ley di LAft y laga e control financiero completamente den man di Hulanda. E Gobierno actual a sufri 3 aña pe no ricibi un aanwijzing.

“For di Hulanda Quito Nicolaas tur dia ta grita pa no entrega autonomia, pero Quito tin añanan bibando na Hulanda y no sa den kico nos pueblo ta pasando aden y e ta bibando dushi dushi di tur loke Hulanda ta ofrece su ciudadanonan”, asina Atan Lee a vocifera awe. Na Corsou, matutino Extra a tene un encuesta y 80% di e participantenan ta desea pa Corsou bira un gemeente. Nan ta pasa den mesun situacion cu nos pais, unda politiconan corupto, hasta a bay cera y tin bou investigacion, a caba cu tur nan placa!

Politiconan elite aki na Aruba cueste loke cueste ta sigui defende e autonomia, sin pensa cu ta nan ta e culpabelnan mas grandi di a laga nos pais sin ningun reserva financiero.

A uza tur placa pa:

  • Paga pensioennan miyonario na politiconan; Apenas 45 aña pa Ministro y 50 aña pa Parlamentarionan. Pregunta ta surgi si na momento cu nan yega na e edadnan aki y ainda ta ocupa un posicion como tal, cu nan a cobra e pensioen tambe? Esaki pueblo ta desea pa haya sa
  • Overbruggingstoelage miyonario cada 4 aña, sea como Ministro o Parlamentario
  • Fabornan na amigo y famianan den tur Gobierno
  • Curupcion, mas corupcion, politiconan investiga, cera y ainda tin mas casonan. Corda cu ta e mesun politiconan ta insulta otro di ta ladron y corupto
  • Companianan di gobierno casi declara falliet. Otro nan reserva financiero ta cabando. Nos moneda ta na punto di perde su balor

Atan Lee ta lamenta cu e politiconan, tur, di tur partido, hunto a hinca Aruba den un debe grandi di riba 8 biyon cu awor ningun Gobierno por paga. A laga nos bira un pais pober y cu hendenan pober. Atan Lee ta puntra pueblo ken a goza di e famoso autonomia? Pueblo no, pero politiconan elite. Cu kico e autonomia a sirbi nos pueblo? Pa politiconan bira miyonario. Nos lucha ta sigui.