Dialuna marduga departamento di IT di Dr. Horacio E. Oduber Hospital a bati alarma pasobra a constata un movecion straño den e netwerk di Hospital. Di biaha a yama e team di IT hunto y a yega na e conclusion cu a afecta e netwerk di Hospital cu un virus miho conoci den e mundo cibernetico como un “ransomware”. Como precaucion a kibra tur conexion externo pa contene e virus mas cu ta posibel.

Di biaha Hunta di Directiva a tuma contacto cu Ministerio Publico cu a sa di indica e pasonan necesario cu mester tuma den casonan asina. Un team di diferente stakeholder externo a bini hunto y desde ayera ta haciendo todo por todo pa yega na un solucion teniendo semper e cuido di  pashent na prome luga.

Mester enfatisa cu e cuido medico ta e parti cu mas Hospital ta boga pe y di biaha a crea diferente team interno pa percura cu e cuido di e pashent no ta sali perhudica di e atake cibernetico aki. Hospital desde mas di un aña pasa a bay over riba digitalisacion di informacion di pashent. E informacion medico di pashent aki ta warda riba “server” na Kansas City cual no ta infecta pa e virus cibernetico aki. Esaki pasobra manera departamento di IT a bati alarma, a kibra tur conexion externo pa por contene e virus.

Na momento cu aña pasa e digitalisacion di informacion di pashent a tuma luga, a traha riba proceduranan si en caso no tin acceso na e sistema (por ehempel si no tin coriente of internet cay). Den e caso aki no tin acceso na e sistema y pues di biaha a bay over riba e proceduranan aki cu ta consisti di entre otro registra tur informacion di pashent manual.

Si awo mester bay den historia medico esey no ta un posibilidad, manera ya a menciona, a kibra tur conexion externo pa contene e virus cibernetico y proteha informacion di pashent. Tur pashent cu a yega Hospital cu tabatin mester di cuido agudo a ricibi esaki. Actualmente ta trahando riba un plan di emergencia temporal pa por sigui registra y yega alabes na informacion di pashent te ora yega na un solucion a largo plaso.

Desde cu e atake aki a tuma luga, tur colega di Hospital a pone man na obra sin pensa dos biaha pa yega na un solucion. Manera cu a yama stakeholders di diferente instancia nan a habri man pa yuda den e problematica aki. Di awo palabra di gratitud pa cada persona cu di un of otro manera ta aportando y trahando duro pa soluciona e problema aki.

Comments

comments