A condena e homber cu a hinca dos turista Mericano den Centraal Station di Amsterdam dos aña pasa na 25 aña di prizon den apelacion. Esey ta un poco mas abao cu e sentencia di prizon di 26 aña y ocho luna cu corte a impone riba Jawed S.
E Afgano cu ta biba na Alemania, a yega Hulanda den zomer di 2018 pasobra e tabata rabia cu Geert Wilders y su competencia di cartoons riba Mohammed. E Mericanonan cu el a puñala a resulta gravemente herida. Un di nan probablemente nunca mas lo por bolbe cana, segun NH News.
Corte ta determina cu ta trata aki di un atake terorista. Corte ta papia di un atake cobarde y ta bisa cu danki na e actuacion rapido di polis cu no tabata tin mas victima. Polis a tira S. kende a ricibi dos bala den 10 seconde.
Tres miyon na daño
E homber di 21 aña a bisa pa prome biaha den apelacion cu e ta lamenta su accionnan. Segun corte, el a bisa esaki solamente pa obtene un sentencia mas abao.
Ministerio Publico a bolbe exigi e condena maximo posibel di casi 27 aña. Segun corte, e pena menor tin di haber cu e penanan imponi riba casonan similar y e edad hoben di e agresor. Tambe a absolve di a menasa e dos polisnan. E cantidad di daño y perhuicio, di casi tres miyon di euro, no lo cambia.
