Aruba Tourism Authority a anticipa na final di aña 2017, cu den aña 2018 turismo di Aruba lo crece cu por lo menos 3.7% riba e crecemento di aña 2017. Obviamente cu ATA no a logra tene su mes na e estimacion haci pasobra a informa ayera cu turismo aña pasa a crece cu solamente 1.1%. Si conta e crecemento den 2017, anto e ora por nota cu nos resultadonan di aña pasa tabata hopi menos di locual a anticipa. Den su relato, ATA ta papia di hopi reto cu e mercado Venezolano, aunke esey ta asina pa bastante aña caba!
Como e autoridad di turismo na Aruba, A.T.A. ta estricto den su maneho. Gerencia ta laga diferente compania independiente haci auditoria riba base kwartaal y anual. For di 2011, na momento cu Oficina di Turismo a bira independiente, por bisa cu orguyo cu tur aña a sa di cumpli debidamente cu entrega di entre otro e Rapport Anual, cu ta inclui resumen di resultadonan y di trabou haci, como tambe e relato financiero cu su respectivo ‘goedkeurende verklaring.’
Conforme ley, tin dos momento clave pa Oficina di Turismo, e prome ta ora di haci entrega di e presupuesto pa e aña siguiente y e di dos momento ta ora di entrega e Rapport Anual cu e resultadonan di e aña anterior. E Rapport Anual ta consisti di un rapport general, financiero y un parti unda ta elabora riba e trabao di e Hunta di Supervision.
Den e parti general di e rapport ta inclui un compilacion di e logronan di e diferente departamentonan den A.T.A., cu ta departamento di Mercadeo, Strategia Investigacion (‘research’) y Planificacion, Destination Services, Recurso Humano y e departamento encarga cu e aspecto financiero y maneho di facilidad di A.T.A.
Prome cu Minister aproba e rapport, esaki ta bay Parlamento di Aruba ‘ter inzage’ pa 10 dia di trabao. Parlamento ta ricibi esaki, cu conforme ley ta e siguiente paso den e proceso di aprobacion, djey pa Minister di Turismo por duna su aprobacion formal pa cu e Rapport Anual di A.T.A. Mester añadi cu fuera di esaki, tur kwartaal A.T.A. ta tene un auditoria financiero independiente, conduci pa e oficina di accounting independiente Grant Thornton.
Lamentablemente den e relato di ATA, ta menciona solamente cifra di 2018 pero no ta duna data pa comparacion, pa asina por midi crecemento e ultimo 5 añanan. Tampoco ta elabora riba e proyectonan cu ATA a patrocina den 2018, por ehempel e cantidad inverti den conciertonan y otro eventonan dedica na turismo, si tabatin un “Return on Investment” manera ta rekeri ora pidi pa sosten financiero.
Fondonan
E entrada primordial di A.T.A. ta e asina yama ‘Tourism Levy’. Gobierno a designa e ‘levy’ aki –cual antes tawata e ‘room tax’- como e componente di entrada primordial pa A.T.A.
Ademas, A.T.A. ta ricibi fondonan adicional di e asina yama ‘Travel Promotion Levy’ desde september 2012, maneha directamente door di A.T.A., cu ta haci esaki den colaboracion estrecho cu IATA (International Air Transport Association). Esaki ta cubri e gastonan haci pa promove Aruba internacionalmente como tambe pa cu desaroyo di nos producto turistico.
Resultado di aña 2018
Pa loke ta trata aña 2018, Aruba su turismo en general a cera cu un crecemento di 1.1%. Esaki ta inclui e mercado di Venezuela, un mercado fragil -y cu sigur a trece su retonan. Nos mercado principal, esta e mercado Norte Americano a cera cu un crecemento di 6.7%. Esaki ta e resultado di esfuersonan adicional/ahuste strategico haci durante e aña pa cu mercadeo den entre otro e mercado Mericano. Conforme resultadonan reporta pa AHATA, e RevPAR a aumenta cu 10.3% pa cu 2018. Segun resultadonan publica pa Banco Central pa 2019, e asina yama ‘Tourism Credits’ pa aña 2018 a conoce un aumento di 8.2% compara cu e mesun temporada na 2017. Ta importante pa menciona cu Banco Central di Aruba den su presentacion nobo di ‘Balance of Payments’ (2018) a reclasifica algun terminologia, cual loke tawata wordo yama ‘Tourism Receipts’ awo ta yama ‘Tourism Credits’. (Fuente: Banco Central di Aruba)
A.T.A. manera semper, lo cana e caminda debido pa asina sigui brinda informacion na Minister y Parlamento di Aruba den e proceso di aprobacion cu ta sigui.
