Diaranson ultimo a tuma luga entrega oficial di e Rapport Anual pa aña 2017 na Minister di Turismo, Danguillaume Oduber, door di Ronella Tjin Asjoe-Croes, CEO di A.T.A. den presencia di Presidente di miembronan di Hunta di Supervision di A.T.A. incluyendo, Cisco Quant, Maarten-Jan van Romondt y Jeanne-Marie Bislik-Oduber. Di parti di Oficina di Turismo tawata presente Sanju Luidens-Daryanani, CMO di A.T.A. y Dyane Vis-Escalona, Business Manager di A.T.A. Ademas tawata presente Gerald Tsu, consehero di Minister di Turismo y representantenan di Ernst & Young.
Como e autoridad di turismo na Aruba, A.T.A. ta estricto den su maneho. Gerencia ta laga diferente compania independiente haci auditoria riba base kwartaal y anual. Esaki a bin ta tuma luga ya for di 2011, na momento cu Oficina di Turismo a bira independiente y orguyosamente por bisa cu tur aña ta cumpli debidamente cu entrega di entre otro e Rapport Anual, cu ta inclui resumen di resultadonan y di trabou haci, como tambe e relato financiero cu su respectivo ‘goedkeurende verklaring.’
Conforme ley, tin dos momento clave pa Oficina di Turismo, e prome ta ora di haci entrega di e presupuesto pa e aña siguiente y e di dos momento ta ora di entrega e Rapport Anual cu e resultadonan di e aña anterior. E Rapport Anual ta consisti di un rapport general, financiero, y un parti unda ta elabora riba e trabao di e Hunta di Supervision. Den e parti general di e rapport ta inclui un compilacion di e logronan di e diferente departamentonan den A.T.A., cual ta e departamento di Mercadeo, Strategia Investigacion (‘research’) y Planificacion, Destination Services, Recurso Humano, y e departamento encarga cu e aspecto financiero y maneho di facilidad di A.T.A.
Prome cu Minister aproba e rapport, esaki lo wordo manda pa parlamento di Aruba ‘ter inzage’ pa 10 dia di trabao. Parlamento ta ricibi esaki, cual conforme ley ta e siguiente paso den e proceso di aprobacion, djey pa Minister di Turismo por duna su aprobacion formal pa cu e Rapport Anual di A.T.A., e edicion di 2017 pa ta exacto.
Esaki ta e di siete Rapport Anual di A.T.A. cu a wordo completa y cu ta carga un ‘goedkeurende verklaring’ di un compania di accounting independiente, esta Ernst & Young. Pa A.T.A. e ta un ehercicio extenso y di suma importancia y un parti integral di e maneho cu ta cana man den man cu ley stipula pa A.T.A. como tambe codigo di ‘Good Corporate Governance’ stipula pa A.T.A.
Mester añadi cu fuera di esaki, A.T.A. ta tene un auditoria financiero independiente per kwartaal, cual ta wordo conduci pa e oficina di accounting independiente den e caso aki PricewaterhouseCoopers.
A.T.A. ta pone hopi enfasis riba su maneho financiero y riba un maneho conforme ley aplicabel pa A.T.A., como tambe conforme locual ta constitui ‘Good Corporate Governance’. E pasonan aki como tal ta refleho di un maneho cu ‘Checks & Balances’ adecua unda A.T.A. ta entre otro wordo audita door di companianan independiente, conforme reglanan internacional.
Fondonan
E entrada primordial di A.T.A. ta e asina yama ‘Tourism Levy’. Gobierno a designa e ‘levy’ aki –cual antes tawata e ‘room tax’- como e componente di entrada primordial pa A.T.A.
Ademas, A.T.A. ta ricibi fondonan adicional di e asina yama ‘Travel Promotion Levy’ desde september 2012 cual ta wordo maneha directamente door di A.T.A., kende ta haci esaki den colaboracion estrecho cu IATA (International Air Transport Association). Esaki ta cubri e gastonan cu ta wordo haci pa promove Aruba internacionalmente como tambe pa cu desaroyo di nos producto turistico.
A.T.A. su entrada total pa 2017 tabata di AWG. 100 miyon, di cual 73% a wordo inverti den mercadeo. A.T.A. su entrada menos su gastonan pa cu 2017 a resulta den 12.4 miyon florin resultado positivo netto, cu lo bay pa caha di gobierno, conforme amienda di ley di A.T.A. cual a pasa na december 2015.
Resultado di aña 2017
Pa loke ta trata aña 2017, Aruba su turismo en general a cera cu un crecemento di 9.1% si exclui e mercado fragil -y cu sigur a trece su retonan- di Venezuela. Nos mercado principal, esta e mercado Norte America a cera cu un crecemento di 10.7%. Esaki ta e resultado di esfuersonan adicional/ahuste strategico cu a wordo haci durante e aña pa cu mercadeo den entre otro e mercado Mericano. Esaki ta wordo refleha no solamente den e cantidad di bishitante, pero tambe den e grado di ocupacion y rendimento (ganashi) pa hotelnan, cual conforme resultadonan reporta pa AHATA a crece cu 4.7% (occupancy) y 10.8% (RevPar) consecuentemente pa cu 2017. Segun ultimo resultadonan publica pa Banco Cenral pa 2018, e Tourism Receipts pa Aruba a subi -te cu september 2017- cu 4.2%.
Gradicimento
A.T.A. ta felicita e ekipo completo di A.T.A. pa un otro bunita logro, esta di por a entrega un rapport cu un ‘goedkeurende verklaring’. Tambe ta gradici Hunta di Supervision, kende a duna prioridad un biaha mas na e rapport importante aki pa A.T.A. y pa bienestar di nos sector turistico. Ademas ta gradici Ernst & Young y mas cu claro ta gradici Minister di Turismo pa e diligencia necesario cu lo ser duna na revision y aprobacion di e documento aki. A.T.A. manera semper lo cana e caminda debido pa asina sigui brinda informacion na Minister y Parlamento di Aruba den e proceso di aprobacion cu ta sigui.
