Dialuna ultimo e conocido Richi Danies a anuncia cu awe diabierna e ta manifesta atrobe dilanti edificio di Parlamento di Aruba, den cuadro di su lucha contra abuso sexual di mucha. El a bisa cu e unico forma pa paralisa Parlamento y pa Gobierno porfin cuminsa duna atencion na e tema aki, ta si por logra haya 7 mil hende eydilanti. E publico sinembargo no a mustra interes pa sostene, pasobra awe a conta no menos cu 15 manifestante na inicio di e manifestacion.
Richi Danies a aclaria cu e ultimo manifestacion contra abuso di mucha di diabierna dia 3 di juli “Ban Caya Aruba”, cu el a opta pa no uni cu e otro gruponan pa varios motibo.
Un grupo grandi di Polis tabata sea presenta pafo di Parlamento como den vecindario directo, pendiente pa si tin cualkier situacion di escalacion. Sinembargo nada di esaki tabata necesario pasobra e grupo di manifestante tabata masha limita. Kisas por ta pa motibo di e situacion di tempo, cu tabata cera y awasero ta manera menasa di yobe. A nota cu despues a yega algun manifestante mas, pero menos di e ultimo manifestacion!
No por keda sin menciona si, sea Bo ta gust’e of no, Reginald Danies a percura, den su forma, pa enfoca y pone tur luz riba e tema di abuso sexual di mucha. Ta dor di su lucha e tema aki a subi e lista di prioridad den comunidad y a haya atencion nacional tanto na nivel Parlamentario como di parti di Gobierno. Asina mes, den comunidad, keto bay e percepcion ta cu e castigonan ta mucho abou y no tin efecto preventivo riba e abusadonan.
