Den comunicado na prensa, Ashan Tromp di CURPA ta elabora riba declaracion di parlamentario di MEP relaciona cu salud mental. Segun Darlaine Guedez-Erasmus di partido MEP, tin 450 mil florin aloca pa proyecto di salud mental.
E ta asombra nos di partido Curpa, con suave e gobierno aki ta tuma e problema di salud mental. E situacion ta asina aki door di entre otro tur e problemanan cu Covid a bin cu ne, manera restriccion di sali for di cas, distancia social cu a imponi riba un pueblo. Un pueblo cu riba su mes ta hopi social y esaki tabatin su consequensianan.
Papiando cu experto algun tempo pasa, e la duna di conoce na partido CURPA cu: “E lo dura ful un generacion prome cu nos wak un mehoracion”.
Aruba actualmente ta den un crisis di salud mental unda cu nos tin cu acudi na Hulanda pa haya e fondo necesario pa por enfrenta e reto aki. Nos situacion di salud mental ta hopi alarmante.
Imagina cu 20 mil hende a kibra nan pia y di e 20 milnan ey tin 18 mil cu si acaso bo pone nan pia den gips, nan lo por recupera y den 3 luna nan ta bon. Mientrastanto e otro 2000 hendenan cu resta, lo keda neglicia pasobra tin poco personal, of tin cu haci escogencia ken si y ken no ta ricibi ayudo.
Na e punto aki nos ta. Pero no kere ami, ta locual cu Tromp ta bisa. Nos tur conoce un polis. Puntr’e si su trabou a bira mas pisa desde 2021 of si acaso e problemanan social a bira mas compara cu e añanan anterior. Nos gobierno no por sigui neglisha cuido di nos hendenan cu problema di salud mental cu mester di ayudo, anto urgente. Gobierno no por hunga cu salud di nos pueblo.
Si e placa ta e problema bay pidi Hulanda, paso pa cada florin cu bo hinca den salud mental bo ta spaar on the long run 10 Florin. E suma di 450 mil Florin ta mane purba tapa e solo cu un dede.
