Local

Specialistanan ta preocupa p’e desaroyo di pandemia

12 September, 2020, 1:30 pm

Specialistanan medico di Dr. Horacio E. Oduber Hospitaal kier expresa nan preocupacion riba e actualidad di e desaroyo di pandemia di COVID-19 riba Aruba. Desde e di dos ola na augustus e cantidad di contagio no ta baha. E cantidad di persona cu ta drenta hospital constantemente ta aumenta. E cantidad di pashentnan den estado grave y fayecido tambe ta aumenta.

E presion riba capacidad di hospital y personal ta aumenta cada bes.Den e ultimo simannan, hospital a amplia e medidanan pa sigura e cuido di e pashentnan cu COVID-19 y pashentnan sin COVID-19. Asina a limita e cuido medico electivo te na cuido esencial y cuido urgente, esaki ta nifica cu operacion- y examennan cu no ta urgente y segun e punto di bista medico por warda, awo ta ser posponi.

Den hospital a traha luga riba pisonan p’e cuido di pashentnan cu COVID-19, esaki ta a costo di nos otro cuido medico. Nursenan, dokternan y personal di apoyo ta traha for di orario regular pa por yuda cu e cuido.

Den ultimo lunanan, varios experto a traha intensivo pa mehora y aumenta protocolnan, guianan, materialnan y recurso humano pa por regula e cuido pa pashentnan cu COVID-19. E obhetivo ta pa laga e cuido medico regular sigui mas cu por.

Intensivamente a traha hunto cu otro dunado di cuido na Aruba, manera asociacion medico di dokter di cas, entre otro, pa enfrenta e epidemia mas miho.

Cu cada aumento di cuido di COVID-19, esaki lo bay a costo di pashentnan cu mester otro tipo di cuido medico. Tin capacidad maximo di cama, regular, pa pashentnan cu COVID-19 y pashentnan di cuido intensivo cu ta depende di factornan manera entre otro mankracht, medicamento y material. Manera cu residente di riba henter e isla ta contagia cu COVID-19, asina tambe ta afecta e personal di nos hospital.

Esaki tin consecuencianan directo pa disponibilidad nos personal.

E capacidad maximo aki di cuido medico ta dinamico y nos tin miedo, a pesar di medidanan di precaucion, cu si e cantidad di contagio no baha y consecuentemente e cantidad di hende gravemente malo di COVID-19 sigui aumenta, pronto hospital no por duna e cuido na tur pashent.

Dr. Horacio E. Oduber Hospital ta e unico hospital di e isla cu por duna e cuido na pashentnan cu COVID-19, e unico cu tin piso di cuido intensivo. E situacion aki ta afecta nos tur.

Na modo di papia, ta 5 minuut pa 12:00 y nos kier urgi e comunidad pa tuma e situacion aki hopi na serio. Asociacion di Specialistanan Hospital di Aruba (ASHA) kier bisa henter comunidad pa sigui medidanan imponi caba manera mantene na e reglanan di higiena di man, mantene distancia y mondkapje, adheri e medidanan di isolacion y cuarentena. Tambe nos kier pidi e poblacion pa awo no bishita famia y amigonan, no bay fiesta ni reunionnan, pero keda cas mas tanto posibel. Solamente por combati e epidemia si tur hende coopera y ta compromete na esaki.