Awe tardi pa mas o menos 4:15pm a bati alarma pa un candela na Hospital. Non ta prome biaha cu, dor di trabounan di construccion, ta presenta candela den e edificio. E biaha aki tabata e edificio bieu, cu awor aki ta den pleno renobacion. Parce cu e dak a pega candela y memey entre e laagnan di e dak tabatin asbest, cu a pone un presion enorme riba e trabounan di combati e candela y evacua tur pashent y trahado, pa evita mas daño pa nan salud. A instala un “Mini Hospital” den cura cu un tent di airco, pa por acomoda pashentnan na un manera sigur. A activa e plan di calamidad, den cual Departamento di Salud Publico tambe ta bay riba stand-by pa brinda sosten, si ta necesario.
“For di momento cu e yamada a drenta y teniendo cuenta cu ta Hospital, nos a despacha dos unidad mesora pa e sitio. A saca un truck for di Aeropuerto y otro for di Tanki Flip, pa por brinda asistencia cu urgencia na Hospital”, asina ing. Eduard de Cuba, Comandante di Cuerpo di Bombero a conta despues cu nan a caba di combati e candela awe tardi lat den e edificio bieu di Hospital. Ta un structura di calamidad a atende cu ne na e sitio, incluyendo cu personal di Hospital, Cuerpo di Bombero, Polis y DVG.
A resulta cu den e edificio bieu, cu awo ta den pleno renobacion, e parti unda tabata oficina, tabata na candela. E prome investigacion di Brandweer ta indica cu posiblemente durante trabounan di construccion, algo a bay robes y e candela a start. Tabatin un poco dificultad na un prome instante, pasobra e construccion bieu ta traha di laag riba laag, strobando Bomberonan pa yega na origen di e candela. Consecuentemente mester a desmantala henter e fachada, pa sigura cu no tin mas candela scondi memey.
Esey a trece un reto cu ne, pasobra dor di e desmantelacion, e gang banda di paden, cu tabata full paden, hopi huma a plama y drenta den camber di pashentnan eybanda. Comandante di Cuerpo di Bombero a felicita e personal di Dr. Horacio E. Oduber Hospital a haci un bon trabou dor di evacua tur e pashentnan mesora.
Den e trabounan di evacuacion, mester a saca pashentnan di ICU tambe y uza nan plan di backup pa pashentnan interna. Den mas o menos 2 ora a logra soluciona e reto ey tambe y pashentnan por a bay bek na nan camber regular.
“Despues di a traha algun buraco den e fachada pa Bomberonan por a mira e candela paden, a bin constata algun material straño, cu a construi riba nan. E materialnan ey tabata explota ratorato y un investigacion a saca afor cu ta trata aki di asbest. Nos mester a tuma extra precaucion pa no plama e asbest di mas pa evita mas reto”, asina Eduard de Cuba a conta. El a bisa si cu Cuerpo di Bombero lo conseha Hospital pa tene bon cuenta den nan trabounan di construccion cu lo sigui, pa evita sigui traha laag riba e material di asbest aki.
Pa Cuerpo di Bombero, e candela awe tin di haber directamente cu trabounan di construccion andando. E ta concui esey pasobra na momento cu ta trahando riba un dak existente, ta rekeri un cantidad di medidanan di precacaucion y den e caso di awe, a tuma nota cu ningun di e medidanan aki tabata “in place”. Pues awor lo mester bay investiga e parti specifico aki.
Dr. Horacio E. Oduber Hospital mes awe a demostra cu nan ta bon prepara pa tipo di calamidadnan asina. Charlaine Alexander-Huntington a sali bisa cu e “Hulpverlenings team” (HVT) interno mes a purba combati e candela pero no a logra y como tal a pidi Brandweer pa activa. E mesun grupo aki a evacua pashentnan y Hospital a sigura cu tur ta sigur y ta bon atendi. Hospital lo warda pa ora cu por garantisa cu tur cos ta sigur, cu no tin problema di huma mas, pa e ora muda pashentnan bek. Nan prioridad ta pa muda e pashentnan di ICU prome, debi cu nan ta riba mashin y despues lo muda e pashentnan regular tambe.
E vocero di Hospital a confirma cu e Bouwcommissie ta midi e riesgonan constantemente. Ta bon pa remarca cu renoba un hotel of un edificio ta hopi diferente na renoba un Hospital cu pashentnan interna, ta trece retonan adicional. Tin diferente protocol cu ta atende pa evita riesgo.
Na final, e Vocero di Hospital no por a keda sin gradici e personal di Hospital mes pa nan trabou. Hopi hende no ta realisa cu na momento di emergencia, e liftnan no ta traha, pues a baha tur pashent via trapi cu cama completo of rolstoel. No tabata facil pero a logra, danki na un bon coordinacion y e preparacion necesario cu Hospital tin bon bou di control.
Charlaine Alexander-Huntington ta pidi tur hende, cu si Bo mester cuido urgente, pa no bay Spoedeisende Hulp na Hospital, sino bay IMSan na San Nicolas. Esaki pa duna e personal un chens pa resolve e retonan cu tin na Hospital ainda, entre otro cu holo di huma cu a drenta e sistema di airco. Claro cu si no por otro, por yega na Hospital y lo brinda asistencia, pero si por yega IMSan, ta recomendabel.
