“ARB Brassband ta e unico brassband Rubiano cu tin na Hulanda, cuminsando cu algun brother cu tabata toca den Quality Brassband y a bin Hulanda pa biba. Nan kiermen cu nan mester sigui toca, ya cu e ta den nan sanger,” Denzil Tromp a conta. “Despues di un aña, mi a bin Hulanda y nan a invita mi pa join. Awo nos ta sigui mehora y keda crece como brassband.”
Un di e momentonan culminante pa ARB Brassband ta nan presentacion anual na “Paranda Rubiano.” “Nos a toca diabierna anochi den Paranda Rubiano, cual a bay master. Zowiezo e fiesta ey t’e fiesta cu nan ta look forward p’e tur aña,” Denzil a splica cu entusiasmo. “Kiermen vooral cu nan ta toca rond di Hulanda, e crowd Rubiano ta duna bo un otro energia. No tin nada mas dushi cu e fiesta ey. El a bay bon.” E evento aki ta un oportunidad pa nan conecta cu nan raisnan y comparti nan musica cu un publico cu ta aprecia nan cultura.
For di cuminsamento, ARB Brassband a enfrenta e reto di adapta na un cultura nobo, mientras cu nan ta mantene nan identidad musical. “Nos tabata traha cu un entertainment company. Aña pasa nan a haya varios toca. Nan tabata toca na varios fiesta y casamento, pa hacimento di aña y tambe tur parti di Hulanda,” Denzil a splica. “Aworaki ta purbando di bay riba nan mes, no solamente forma nan grupo di tocado y bailarin. Tin un grupo di bailarin Rubiano cu ta duna les, toevalig famia di algun di e tocadonan. Nan ta purbando di purba di cera na grupo cu por bira nan mesun entertainment company.”
Awo, ARB Brassband ta enfocando riba lanta fondo y construi un futuro sostenibel. “Aworaki nan ta bezig cu snackbox, ta haci un fundraising pa por invest y tin un capital pa nan por cuminsa bon. Djis purba di keda crece, pasobra tin hopi pa crece na Hulanda,” Denzil a comparti. “Eynan e ta djis mas cu un hobby. Ta algun di e cosnan cu mester siña cu na Hulanda e ta un trabao, bo ta wordo paga y ta expect responsabilidad cu ta train y serio. Esey ta purba di keda te ora cu yega mas leu cu nan por.”
