Director nobo di Arubus Edwin Mohammed den un conferencia di prensa diaranson mainta a informa cu “nos ta bay duna mas balor pa bo cla”.
Un di e prome cosnan cu Mohammed a menciona ta wi-fi ta bay ta disponibel riba e vehiculonan nobo di Arubus, igualmente tin aparatonan pa charge celular. Pero tambe tur e vehiculonan cu a cumpra awo y den futuro ta aire-acondiciona. “Nos kier bay na nos “core-business”, esta di hiba e pasahero na unda e kier yega,” e director a comenta.
Pa loke ta Aruparking, ta trahando pa bini cu un aplicacion, cu ta haci e sistema di pago pa e clientela hopi mas facil y di otro banda e control pa Aruparking ta mas facil tambe. Asina e idea ta pa introduci un sistema cu e cliente por paga cu debit- y creditcard, cu ta pa mehora e servicio na e cliente.
Ta trahando riba e sistema di parkeo unda cu lo tin 555 parkeervak gratis rond Playa. Tambe tin esnan di strepi geel y 496 lo keda disponibel pa esnan cu a pidi un vergunning pa parkeo na luganan specifico, mientras cu e vaknan blanco numera pa cual mester paga ta 584. Ta trahando riba e plannan aki.
Arubus ta bay duna mas balor pa bo placa
Arubus ta bay duna mas balor pa bo placa. Click e link pa mas https://24ora.tv/2Xq3qT7
Posted by 24ora on Wednesday, July 3, 2019
Den e caso di Arutram ta sondeando con por haci su funcionamento mas eficiente, pa crea mas negoshi cu Arutram. Ta buscando mas aliansa cu e negoshinan den centro di ciudad, pa hiba mas turista na e area aki pa haci nan compranan.
Mohammed a presenta hunto cu su team gerencial di Arubus, Aruparking y Arutram.
Pa bini cu e cambionan, el a bisa tin hopi retonan cu nan lo confronta cun’e. Den e caso di Aruparking ta trahando pa bini cu e cambionan structural y mesun cos ta haci cu e cambionan di e otro dos empresanan. El a splica cu p.e. ora cu a kita klem, pasobra den ley tin cierto cosnan stipula cu mester a inscronisa cu nan maneho. “No tin un fecha oficial, aunke internamente nos tin un fecha cu cual nos mester ta hopi cauteloso. Esaki pasobra cierto cambionan den ley no ta algo cu ta den nos man,” e director a bisa.
Ya caba e compania a busca mashinnan completamente nobo, unda cu e processor paden lo ta diferente. E hecho cu a cumpra mashinnan nobo no ta nifica cu tur e mashinnan di pago ta bay wordo cambia.
