Den e di tres comunicado aki Departamento di Salud Publico (DVG) ta informa tocante e documentacion rekeri y e proceso pa por aplica pa registra den AruBIG. E cambio di ley ta trece cambionan grandi den e procedura. E procedura nobo ta encera un aplicacion completamente digital. No ta acepta mas pa entrega papel fisicamente na DVG. Tur candidato mester aplica pa medio di e Formulario Digital riba e website di DVG. Denter di poco lo lansa e pagina di AruBIG riba e website di DVG. Aki riba lo por haya e rekisitonan pa por aplica, pero tambe e formulario digital pa por registra. Pa prepara pa e cambio e siguiente informacion ta wordo duna na publico en general.
Rekisitonan (documentonan)
Mester subi (upload)e siguiente documentacion:
- Copia di paspoort valido;
- Un permiso di estadia, si ta aplicabel;
- Un Curriculum Vitae;
- Tur diploma relevante;
- Prueba di inscripcion den BIG di Hulanda of cu a pasa exitosamente e board exam di Canada y USA;
- Acta di permiso bou di e ley bieu pa partera, dentista, boticario of medico, si ta aplicabel;
- Un ‘intentieverklaring’ di e instancia di cuido of cooperativa estableci y reconoci na Aruba;
- E resultado di e EPIC screening door di ECFMG (USA) pa tur medico no studia na Hulanda;
- Pa profesion di dentista cu no a studia na Hulanda tambe un prueba di e colegio of Ministerio di e pais na unda a studia tocante e status actual di e profesional (CCPS).
Den total esaki nan no mester surpasa 10 MB den tamaño y mester por lesa e documentonan. Si no por lesa e documentacion, no pos sigui cu e proceso. Den e caso ey e persona cu a aplica mester manda e documentacion di nobo.
Proceso di aplicacion
Una bes e candidato of e funcionario di recurso humando den e instancia di cuido/cooperativa tin tur documento y informacion rekeri cla, por cuminsa cu e proceso di aplicacion riba e website di DVG una bes esaki wordo lansa (‘bay live’). E proceso ta tarda algun siman pa screen cada peticion. Si tin algun documentacion cu falta of tin algun iregularidad, DVG lo tuma contacto cu e peticionario pa wak con leu por drecha esakinan pa asina e proceso por sigui. Na un resultado positivo ta sigui un carta cu lo inscribi e persona den e sistema di AruBIG.
Registro di ArubIG y gastonan envolvi
E registro di AruBIG ta rekeri cu tin profesionalnan cu a inscribi prome. Esaki lo cay den un siguiente fase. Den e fase aki e registro di AruBIG lo wordo lansa pa publico en general. Esaki lo wordo anuncia despues conforme tur procedura legal.
Por lo pronto no lo tin ningun gasto mara na e registro di ArubIG pa aña 2021. Mirando e recorte pa tur instancia di salud e aña aki, gobierno a tuma e decision di ta solidario cu dunadonan di cuido. Pa e motibo aki gobierno no ta cobra pa e servicio di AruBIG pa aña 2021. Na comienso di otro aña lo haci un evaluacion si ta introduci un tarifa pa cubri gastonan envolvi cu AruBIG pa loke ta trata e investigacion prome y despues di e registracion.
